Zjarre në Pukë dhe Durrës, digjen dhjetëra hektarë

Flakët e zjarrit kanë përpirë hektarë të tërë me pyje në fshatin Iballë të Pukës. Zjarri i rënë mbrëmë, nuk është shuar ende. Po kështu në Spitallë të Durrësit, një zjarr që u ndez mbrëmë ka djegur afro 5 dylym pyje si dhe ka shkrumbuar 1 500 rrënjë ulliri.

Ndërsa në Spitallë flakët janë shuar në Iballë të Pukës ato vazhdojnë të përpijnë pemët. Zjarri po favorizohet nga temperaturat e larta dhe era e fortë. Banorë dhe zjarrfikës ndodhen pranë vatrës dhe po mundohen të shuajnë flakët e mëdha, por vështirësitë rriten për shkak të terrenit të thyer malor ndaj ndërhyrja propozohet të kryhet vetëm nëpërmjet ajrit.

Dyshohet se zjarri mund të jetë shkaktuar nga pakujdesia e banorëve të zonës. Situata është drejt përkeqësimit, duke shkatërruar masivin pyjor që karakterizon zonën e thellë malore të Iballës.