Zona muzeale kundër taksës së ndriçimit

 

GJIROKASTER - Bizneset në pjesën muzeale të Gjirokastrës rebelohen ndaj bashkisë. Shkak është bërë ngritja e taksës së ndriçimit në masën 50% për ta, në një kohë kur veprimtaria e tyre është më pak e frekuentueshme nga konsumatorët, në raport me pjesën tjetër të qytetit. Një ditë pas aprovimit të rritjes së taksës së energjisë për të gjitha subjektet tregtare në qytet nga ana e Këshillit Bashkiak, kanë ardhur edhe reagimet e para prej tregtarëve që ushtrojnë veprimtarinë e tyre në pjesën muzeale. Për tregtarin Dhosi Margariti, ngritja e taksës së ndriçimit në masën 50%, është një tjetër rëndesë për buxhetin e varfër të tregtarëve, që qëndrojnë me halle në pjesën muzeale të qytetit. Përveç problemeve që kemi me gjetjen e tregut për konsumatorët, taksave mujore dhe ato vjetore, u desh dhe ngritja e taksës së ndriçimit, paçka se ndriçimi herë është e herë nuk është. Për Bashkinë e Gjirokastrës, rritja e taksës së energjisë elektrike është një lëvizje, që justifikon ngritjen e çmimit të energjisë prej disa vitesh dhe që pritet të rritet ende me privatizimin e sektorit të shpërndarjes në fillim të vitit të ri. Tregtarët nga ana e tyre, kanë akuzuar Bashkinë e Gjirokastrës se nuk kanë pasur akses nga ajo për uljen e diferencuar të taksave, ashtu siç ishte premtuar më parë për këtë kategori tregtarësh, që ndodhen në zonën e Pazarit Karakteristik. Në pjesën karakteristike të Gjirokastrës ushtrojnë veprimtari tregtare rreth 50 biznese të vogla, kryesisht shitore të mallrave ushqimore, artistike, lokale si dhe qendra të informimit turistik.        p.n