Çelet Panairi Veror i Librit 2009

U çel dje në Ulqin Panairi Veror i Librit 2009, i cili do të qëndrojë i hapur deri më datën 2 gusht. Nën kujdesin e Shoqatës së Botuesve Shqiptarë dhe Komunës së Ulqinit, panairi u çel mbrëmë me dy të ftuar të veçantë, si Presidenti i Shqipërisë, Bamir Topi, dhe ai i Malit të Zi, Filip Vujanoviq. Ndërkaq, do të jenë pjesë e këtij panairi si të ftuar specialë shkrimtarët, studiuesit dhe akademikët Ali Aliu nga Shkupi, Shefkije Islamaj nga Prishtina dhe shkrimtari, studiuesi dhe eseisti nga Mali i Zi, Andreji Nikolaidis. Gjatë ditëve të panairit, një vend të veçantë do të zënë veprimtaritë me karakter kulturor kombëtar, që vijnë nga e gjithë hapësira shqiptare e rajoni. Mbi 60 botues do të jenë pjesë e ditëve të panairit, ndërsa parashikohet të ekspozohen dhe të ofrohen për shitje mbi 6000 tituj librash, nga të cilat mbi 500 janë tituj të rinj.