Gogu me homologun holandez: Bashkëpunim në drejtësi dhe luftë kundër krimit të organizuar

TIRANË, 17 qershor/ATSH/ Ministri i Drejtësisë, Toni Gogu zhvilloi sot një takim në Strasburg me homologun e tij në qeverinë e Holandës, David Van Weel, ku u diskutuan fushat kryesore të bashkëpunimit dypalësh në funksion të integrimit europian të Shqipërisë.

Ministri Gogu e vlerësoi Holandën si partner kërkues, por konstruktiv. “Diskutojmë rezultatet, diskutojmë projekte konkrete sesi Shqipëria të mundet të përfundojë ëndrrën dhe projektin e anëtarësimit europian”, u shpreh ai.

Në fokus të takimit ishin reforma gjyqësore, forcimi i shtetit të së drejtës, aksesi i qytetarëve në drejtësi, përfshirë ndihmën juridike dhe ndërmjetësimin, si dhe bashkëpunimi në luftën kundër krimit të organizuar.

Ministri Van Weel, i cili mori detyrën në shkurt të këtij viti, e cilësoi takimin si të rëndësishëm dhe theksoi lidhjet e forta midis dy vendeve. “Jemi aleatë në NATO, por gjithashtu Shqipëria është shumë e avancuar në procesin e anëtarësimit në BE dhe ne po e ndihmojmë Shqipërinë edhe për këtë”, tha ai.

Van Weel nënvizoi gjithashtu se krimi i organizuar mbetet një sfidë e përbashkët dhe se sistemet gjyqësore të dy vendeve bashkëpunojnë ngushtë në këtë drejtim.

Të dy ministrat shprehën gatishmërinë për të thelluar më tej partneritetin, me synim mbërritjen e anëtarësimit të Shqipërisë në BE brenda afateve të vendosura.

/m.m/r.e/a.f/