INDI – Merz dhe Modi bien dakord për bashkëpunim më të ngushtë gjermano-indian në mbrojtje
AHMEDABAD, 12 janar /ATSH-DPA/- Gjermania dhe India synojnë të zgjerojnë bashkëpunimin e tyre në sektorin e mbrojtjes, përmes një deklarate qëllimi të nënshkruar nga ministritë e tyre të Mbrojtjes, gjatë vizitës së kancelarit Friedrich Merz sot në qytetin indian, Ahmedabad.
Merz u prit nga kryeministri indian, Narendra Modi.
TKMS e Gjermanisë do të ndërtojë nëndetëse në Indi
Kontratat për projekte specifike nuk u lidhën fillimisht, por India planifikon të ndërtojë gjashtë nëndetëse në bashkëpunim me kompaninë gjermane “Thyssenkrupp Marine Systems” (TKMS) në Mumbai, me vlerë 8 miliardë euro.
Nënshkrimi i marrëveshjes pritet së shpejti dhe mund të hapë rrugën për bashkëpunim të mëtejshëm.
Sipas statistikave të fundit nga Instituti Ndërkombëtar i Kërkimeve për Paqen në Stokholm (SIPRI), India konsiderohet importuesja më e madhe e armëve në botë.
Midis viteve 2019 dhe 2023, vendi furnizoi 36% të armatimeve të tij nga Rusia, megjithëse tendenca është në rënie. Eksportet gjermane të armëve në Indi mund të ulin gjithashtu varësinë e Indisë nga Rusia.
Nënshkruhen gjithsej 27 marrëveshje
Në total, u nënshkruan 27 deklarata qëllimi dhe njoftime në margjinat e bisedimeve midis Merz dhe kryeministrit indian Narendra Modi – duke filluar nga bashkëpunimi në nxjerrjen e metaleve të rralla deri te promovimi i talenteve të hokejit në të dy vendet dhe rekrutimi i punonjësve të kualifikuar për sistemin gjerman të kujdesit shëndetësor.
Rekrutimi i punonjësve të kualifikuar nga India është avancuar tashmë nga qeveritë e mëparshme.
Sipas Agjencisë Federale të Punësimit, numri i indianëve të punësuar në punë të rregullta në Gjermani është rritur nga më pak se 25 000 në vitin 2015 në gati 170 000 në vitin 2025. //a.i/