KPA lë në fuqi shkarkimin nga detyra të prokurorit Astrit Halilaj
TIRANË, 14 maj/ATSH/ Kolegji i Posaçëm i Apelimit (KPA) vendosi të lërë në fuqi vendimin e Komisionit të Pavarur të Kualifikimit, për shkarkimin nga detyra të prokurorit të Shkodrës, Astrit Halilaj.
Sipas njoftimit të KPA-së, vendimi u mor në mënyrë unanime nga trupi gjykues i Kolegjit i kryesuar nga Albana Shtylla, me relatore Mimoza Tasi dhe anëtarë Natasha Mulaj, Rezarta Schuetz e Sokol Çomo, pas shqyrtimit në dhomë këshillimi të ankimit të Halilajt. Vendimi i KPA është përfundimtar dhe me efekt të menjëhershëm.
Prokurori i Shkodrës, Astrit Halilaj u shkarkua nga detyra më 30 qershor 2022, pasi Komisioni arriti në përfundimin se ai kishte kryer deklarim të pamjaftueshëm për pasuritë. Ndërkohë, Halilaj u vlerësua pozitivisht për pastërtinë e figurës dhe për profesionalizmin.
Astrit Halilaj e filloi karrierën si oficer i policisë gjyqësore në vitin 1993 dhe përgjatë dy dekadave ka mbajtur pozicione drejtuese në Policinë e Shtetit. Prej vitit 2016, ai punoi si prokuror pranë Prokurorisë së Rrethit Gjyqësor Shkodër.
/j.p/r.e/