Kanabis me postë nga SHBA, Prokuroria Tiranë zbulon tetë raste të trafikimit në një muaj

TIRANË, 28 prill /ATSH/ Prokuroria e Tiranës në bashkëpunim me Policinë e Shtetit dhe Postën Shqiptare kanë goditur vetëm gjatë muajit prill, tetë raste të trafikimit të kanabisit nga Shtetet e Bashkuara të Amerikës në Shqipëri.

Sipas prokurorisë “kanabisi, me përqindje të lartë THC transportohej nga SHBA-të drejt Shqipërisë nëpërmjet pakove postare, një fenomen i zbuluar nëpërmjet hetimeve proaktive dhe i shtrirë në pothuajse gjithë territorin e vendit”.

Prokuroria e Tiranës bëri të ditur se vetëm gjatë muajit të fundit ka identifikuar raste të këtij lloj trafikimi në qytetet: Tiranë, Shkodër, Fier, Elbasan e Vorë. Ndërkohë që hetimet vijojnë për raste të tjera.

“Deri më sot, në tetë rastet e zbuluara janë sekuestruar në total 15.2 kg kanabis me përqindje të lartë THC, ndërkohë që janë arrestuar dhe shpallur në kërkim si të implikuar në këtë veprimtari kriminale, 12 persona. Një pjesë prej tyre, janë arrestuar në flagrancë në momentin e marrjes në dorëzim të pakove me kanabis në degë të ndryshme të Postës Shqiptare”, njoftoi Prokuroria.

Hetimet vijojnë për identifikimin dhe ndalimin e shtetasve të tjerë të dyshuar të përfshirë në këtë veprimtari kriminale.

/a.f//r.e/