Kujtohet Kubrick

Një ditë nuk mjafton për të rrëfyer Stanley Kubrick. 9-vjetori i vdekjes i një prej ikonave të kinemasë botërore është shoqëruar dje me aktivitete në të gjithë botën. Ky përvjetor ndarjeje nga jeta u kujtua bashkë me 40-vjetorin e një prej filmave më të mëdhenj fantashkencorë të të gjithë kohërave (sipas një sondazhi me 2700 shkencëtarë të Amerikës) "ODISEA 2001" (i prodhuar në 1968-ën). Në Shqipëri kujtimi i tij është nderuar me një aktivitet të veçantë në sallën e kinemasë "Marubi". Aktiviteti u zhvillua nën kujdesin e shkollës së filmit "Marubi" dhe Institutit të Artit. Kubrick vdiq më 7 mars 1999, gjatë procesit të montimit të filmit të paharrueshëm "Eyes Wide Shut", në moshën 70-vjeçare. Që nga 1999, çdo vit më 7 mars në shumë vende të botës organizohen aktivitete për yllin e kinemasë, filozofin Stanley Kubrick, jo më shumë për t‘i bërë respekt kujtimit të tij, por për më tepër për të kuptuar më shumë gjuhën e tij unikale shumështresore kinematografike. Në ekranin e "Marubit" u dha një koktej me etydet më të paharrueshme vizuale dhe sonore të të gjithë produksionit kubrickian (janë përdorur si lëndë e parë te 13 filmat e tij të karrierës 50-vjeçare) të shoqëruara me komente paralele në një ekran plotësues. Gjithashtu, u bë një përpjekje analitike për të zbërthyer 2 nga pjesët më të famshme emblematike të censuruara nga Hollivudi në fillim dhe në fund të karrierës së Kubrick: "PARTACUS" (biseda e molestimit të Perandorit Kras me skllavin e tij poet Antonino).
"EYES WIDE SHUT" (rituali seksual i mbrëmjes me maska). Zbërthimi i "kodeve" kubrickiane (nga e ka marrë dhe emrin ky aktivitet) është një përpjekje jashtë të mundshmes, por pikërisht arti prandaj shërben, për të kuptuar (tej të mundshmes) thelbin artistik të veprës dhe autorit.