SHBA – Rubio do të takohet me zyrtarët danezë javën e ardhshme mes mosmarrëveshjeve për Groenlandën

UASHINGTON, 7 janar /ATSH-DPA/-  Sekretari amerikan i Shtetit, Marco Rubio thasot se ka planifikuar të takohet me përfaqësuesit e Danimarkës, javën e ardhshme për të diskutuar mosmarrëveshjet për Groenlandën

Ai nuk pranoi të thoshte nëse kjo nënkuptonte që veprimi ushtarak i SHBA-së për të marrë kontrollin e ishullit ishte jashtë diskutimit.

Duke folur me gazetarët, Rubio nuk specifikoi se kur ose ku do të zhvillohej takimi.

Danimarka dhe Groenlanda kishin kërkuar më herët bisedime me diplomatin më të lartë të SHBA-së.

Kryeministri i Groenlandës, Jens-Frederik Nielsen, tha këtë javë se ishte i frustruar që komunikimi me SHBA-në ishte kryer, kryesisht përmes medias.

Presidenti i SHBA-së, Donald Trump, kohët e fundit ngriti sërish mundësinë e aneksimit ose blerjes së Groenlandës, duke përmendur interesat e sigurisë kombëtare të SHBA-së.

Groenlanda, shtëpia e rreth 57 000 banorëve, është kryesisht autonome, por zyrtarisht pjesë e Mbretërisë së Danimarkës, e cila është anëtare e NATO-s.

Trump e ka lakmuar prej kohësh Groenlandën. Gjatë mandatit të tij të parë, ai shkaktoi shqetësim diplomatik duke shprehur interes për blerjen e ishullit Arktik.

Sekretarja e Shtypit e Shtëpisë së Bardhë, Karoline Leavitt, tha sot se mundësia e blerjes së Groenlandës po diskutohej në mënyrë aktive nga presidenti Trump dhe ekipi i tij.

“Të gjitha opsionet janë në tryezën e bisedimeve për presidentin Trump, ndërsa ai shqyrton se çfarë është në interesin më të mirë të SHBA-së, por ju bëj me dije se opsioni i parë i presidentit ka qenë gjithmonë diplomacia”, tha ajo.

Qeveria daneze, e mbështetur nga disa partnerë evropianë, si Gjermania, Franca dhe Britania e Madhe, ka hedhur poshtë me vendosmëri pretendimet e Trump për aneksimin e ishullint.

Kryeministrja daneze, Mette Frederiksen ka paralajmëruar se një sulm i SHBA-së ndaj Groenlandës do ta çonte në fund NATO-n. //a.i/