UKRAINË – Shefi i shërbimit sekret jep dorëheqjen si pjesë e riorganizimit të organit të sigurisë
KIEV, 5 janar /ATSH-DPA/ – Kreu i shërbimit të sigurisë SBU të Ukrainës, Vasyl Malyuk do të japë dorëheqjen nga posti i tij, tha sot presidenti ukrainas, Volodymyr Zelensky.
Malyuk konfirmoi në platformën “Telegram” se po jepte dorëheqjen dhe tha se do të mbetej në sistemin e SBU-së – për të zbatuar operacione speciale asimetrike të nivelit botëror.
Termi i referohet përdorimit të taktikave jokonvencionale kundër një kundërshtari, siç janë sulmet kibernetike, lufta guerile ose bastisjet e synuara.
Malyuk, 42 vjeç, ka udhëhequr SBU-në që nga viti 2023, gjatë së cilës kohë ai mbikëqyri disa nga vrasjet e profilit të lartë të agjencisë dhe operacionet speciale më të guximshme brenda Rusisë.
Zelensky u takua me Malyuk për ta falënderuar për shërbimin e tij dhe për ta angazhuar atë në operacione të fshehta, brenda SBU-së.
Zelensky aktualisht po ristrukturon organin e sigurisë dhe mbrojtjes së Ukrainës, pas gati katër vitesh lufte kundër forcave ruse që nisi në shkurt 2022.
Ai lëshoi sot një dekret që urdhëronte Yevgeny Khmara të merrte përsipër detyrën e kreut të përkohshëm të SBU-së.
Chmara është aktualisht kreu i Qendrës për Operacione Speciale “A” të shërbimit sekret ukrainas.
Zelensky emëroi ish-zëvendëskryeministren kanadeze Chrystia Freeland si këshilltare për zhvillimin ekonomik. Ish-gazetarja vjen nga një familje emigrantësh ukrainase në Kanada.
Ai emëroi ish-kreun e inteligjencës ushtarake, Kyrylo Budanov, si kreun e zyrës së tij presidenciale.
“Zëvendëskryetari i qeverisë dhe ministri për Transformimin Digjital, Mykhailo Fedorov, do të marrë përsipër portofolin e mbrojtjes nga Denys Shmyhal”, tha Zelensky.
Shmyhal, i cili më parë shërbeu edhe si kryeministër, do të bëhet ministër i Energjisë. Parlamenti duhet së pari të konfirmojë emërimet. //a.i/