Zendaya mahnit me paraqitjen e saj për Halloween, aktorja rikthen veshjen ikonike të Halle Berry-t nga viti 2000

Zendaya ka surprizuar fansat duke rikthyer një nga paraqitjet më ikonike të aktores Halle Berry në tapetin e kuq. Për Halloween-in e këtij viti, aktorja zgjodhi të risillte në vëmendje një veshje të famshme të vitit 2000, duke dëshmuar edhe një herë se stili i modës nuk njeh kohë.

Me ndihmën e stilistit të saj prej vitesh, Law Roach, ylli i serialit Euphoria rikrijoi veshjen e famshme të shtëpisë franceze të modës Lanvin, të cilën Halle Berry e kishte veshur në premierën e filmit X-Men, në Nju Jork, gjatë verës së vitit 2000.

Law Roach publikoi në Instagram një video dhe disa fotografi ku Zendaya shfaqet me të njëjtën veshje që dikur kishte tërhequr vëmendjen e të gjithëve, e veshur nga Halle Berry.

Ansambli, pjesë e koleksionit vjeshtë 2000 të Lanvin, përbëhet nga një bluzë e shkurtër në stilin bikini, me nuanca të buta të verdhë, kafe dhe të bardhë, e zbukuruar me detaje argjendi, si dhe pantallona me të njëjtin dizajn.

Në vitin 2000, Halle Berry e kishte kombinuar veshjen me një zinxhir në bel, sandale argjendi dhe vathë diamanti. Ndërsa Zendaya i dha një interpretim të ri, duke e kombinuar me këpucë elegante me majë, syze dielli ngjyrë kafe dhe modelin e shkurtër të flokëve, duke iu afruar edhe më shumë pamjes origjinale të aktores.

Ngjashmëria mes dy yjeve nuk kaloi pa u vënë re nga fansat në rrjetet sociale, të cilët komentuan entuziastë për rikrijimin e kësaj paraqitjeje ikonike. Madje, edhe vetë Halle Berry reagoi ndaj postimit, duke lënë disa zemra të kuqe në komentet e tij.

Në përshkrimin e publikimit, Law Roach falënderoi drejtorin artistik të Lanvin, Peter Copping, si dhe drejtorin e marketingut dhe komunikimit, Alix Long, për mbështetjen në realizimin e këtij rikrijimi. Ai gjithashtu përmendi Philip Bloch, stilistin që kishte kontribuar në krijimin e pamjes së Halle Berry-t në vitin 2000.

Sipas revistës amerikane ELLE, Peter Copping mori drejtimin kreativ të shtëpisë së modës Lanvin në vitin 2024. Ndërkohë, në kohën kur u prezantua koleksioni i vitit 2000, stilistja përgjegjëse për linjën e veshjeve për femra ishte Cristina Ortiz.

Ndërkohë, Zendaya dhe Law Roach pritet të sjellin edhe paraqitje të tjera të veçanta në botën e modës, teksa kanë nisur aktivitetet promovuese për filmin Dune: Part Three, i cili pritet të shfaqet në kinema gjatë muajit dhjetor.