10 zv.ministrat në "hije" të kabinetit "Berisha"

Një pjesë e konsiderueshme e zëvendësministrave të qeverisë "Berisha" rezulton të jenë krejt në hije në raport me publikun. Numrat dy të ministrive vetëm në pak raste shihen para kamerave, duke preferuar të qëndrojnë në prapavijë. Më të pranishmit në media janë zëvendësministrat e Punëve të Brendshme, Ferdinand Pone dhe Gent Strazimiri. Të njëjtin tregues kanë edhe zëvendësministrat e Financave, Florian Mima e Sherefedin Shehu, dhe ajo e Punëve të Jashtme, Edith Harxhi. Pakkush nga opinioni publik mund ta dijë se Kastriot Sulka figuron zëvendësministër i Punës dhe Çështjeve Sociale. Ai rezulton të ketë mbaruar ekonomi politike në Universitetin e Tiranës në vitet 1982-1987. Më pas, menaxhim të tregut të energjisë elektrike në Toronto të Kanadasë. Ndoc Fazllia është zëvendësministër i Bujqësisë. Ai është diplomuar në agronomi, Universiteti Bujqësor i Tiranës. Nga vitet 1983-1991 ishte specialist i Prodhimit Bimor, 1993-1995, ekspert në projektin "Agriculture Swiss Project", ndërsa 2000- 2005 pedagog i Sistematikës së Bimëve, Departamenti i Agronomisë, Universiteti Bujqësor, Tiranë. Zamira Sinoimeri është në detyrën e zëvendësministres së Shëndetësisë. Që nga viti 1993, e përfshirë në punën për reformimin e sistemit të kujdesit shëndetësor në Shqipëri dhe në formulimin e politikave shëndetësore. Ndue Preka është në funksionin e zëvendësministrit të Bujqësisë dhe Ushqimit. Në vitin 1978, ka mbaruar Universitetin Bujqësor të Tiranës, Fakulteti i Ekonomisë Agrare. Në vitet 2001-2005 ishte deputet i Kuvendit të Shqipërisë. 1997-2001 kishte detyrën e drejtorit të Drejtorisë së Ujërave në Lezhë. Një tjetër emër është Suzana Turku, në detyrën e zëvendësministres së Kulturës dhe Turizmit. 2000-2005 ishte pedagoge në institucionin Akademia e Arteve të Bukura dhe më parë dirigjente e Korit Kombëtar në institucionin Teatri i Operës dhe Baletit (TOB). Ardiana Gjonaj është në funksionin e zëvendësministres së Arsimit dhe ka punuar në vitet 1993-1995 si përgjegjëse departamenti e seksioni, Departamenti i Informatikës, Universiteti Politeknik. 1998-2002, përgjegjëse për shkollën pasuniversitare "Informatika në shkencat inxhinierike". Në faqen zyrtare të Këshillit të Ministrave nuk figuron asnjë jetëshkrim për zëvendësministrin e Drejtësisë, Viktor Gumi. Po aq larg vëmendjes së medias është edhe Stavri Ristani, zëvendësministër i Punëve Publike, diplomuar me titullin Inxhinier Hidroteknik. Në detyrën e zëvendësministrit të Punëve Publike është Ernest Noka, por krejt larg vëmendjes së publikut. Halit Shamata është zëvendësministër i Arsimit dhe që nga vitit 1998 deri në 2004, është marrë me krijimtari letrare dhe publicistike. Detyrat e mëparshme janë ajo e deputetit dhe ministrit të Brendshëm.

Tabela

Emrat

Kastriot Sulka

Zëvendësministër i Punës

Ndoc Fazllia

Zëvendësministër i Bujqësisë

Zamira Sinoimeri

Zëvendësministre e Shëndetësisë

Ndue Preka

Zëvendësministër i Bujqësisë

Suzana Turku

Zëvendësministre e Turizmit

Ardiana Gjonaj

Zëvendësministre e Arsimit

Viktor Gumi

Zëvendësministër i Drejtësisë

Stavri Ristani

Zëvendësministër i Punëve Publike

Ernest Noka

Zëvendësministër i Punëve Publike

Halit Shamata

Zëvendësministër i Arsimit