50 gola në vit, s’janë pak

Mario Gomez pati një vit të jashtëzakonshëm. Sulmuesi gjerman realizoi rreth 50 gola gjatë vitit 2011, duke përfshirë këtu Bayern Munichun dhe Kombëtaren e Gjermanisë. Ai fitoi reputacion të madh dhe u bë njëri prej sulmuesve më të rrezikshëm në botë. Ish futbollisti i Stuttgartit e pranon se nuk ishte aspak e lehtë ta arrinte këtë shifër.

“Do të shoh nëse mund ta përsëris këtë shifër. Ky është numër i madh golash. 50 gola për një vit është mjaft, mjaft shumë. Por, unë do të dëshiroja të jem më i mirë çdo vit”, theksoi Gomez për goal.com.

Këtë sezon, Gomez ka realizuar 16 gola në Bundesliga dhe 7 të tjera në Ligën e Kampionëve. Ai shpreson që të jetë i rëndësishëm edhe në Euro 2012, pas dështimit që pati në Euro 2008, kur kishte humbur disa raste, në fazën e grupeve.

“Po, natyrisht. Shpresoj që të shënoj në Evropian dhe po ashtu ta fitoj këtë eveniment”, vazhdoi ai. Gomez shpreson që ta fitojë edhe Bundesligën me klubin bavarez këtë sezon.