52 njësi vendore nuk kanë dorëzuar listat e përditësuara me qendrat e votimit

Reagon drejtori i DPGJC TIRANE - Rreth 52 njësi të qeverisjes vendore në shkallë vendi ende nuk kanë dorëzuar, në Drejtorinë e Përgjithshme të Gjendjes Civile, CD-të me listat e përditësuara me qendrat e votimit. Drejtoria e Përgjithshme e Gjendjes Civile, në një njoftim për shtyp të enjten, bëri të ditur se “udhëzimi nr. 67 datë  06.02.2009, ku përcaktohen të gjitha hapat që duhen ndjekur për përgatitjen e listës paraprake të zgjedhësve, parashikonte datën 24.02.2009 si datën e fundit të dorëzimit të CD-ve me listat e përditësuara me qendrat e votimit në DPGJC, në mënyrë që të bëhet hedhja e tyre në sistem, për të bërë të mundur printimin nga njësitë vendore të listave paraprake në afatin ligjor me burim Regjistrin Kombëtar të Gjendjes Civile”. Sipas Drejtorisë së Përgjithshme të Gjendjes Civile, në listat e shpërndara prej sa, 97% e punës që duhet të bëhej nga kryetarët e njësive vendore ishte kryer dhe vetëm për 88.000 zgjedhës nga 3.133.000 duheshin vendosur qendrat e votimit. “Deri në këtë moment, pra dy ditë pasi ka kaluar afati, 52 njësi vendore nuk kanë dorëzuar akoma CD me listat në DPGJC, duke u bërë kështu pengesë për realizimin e detyrimeve ligjore që kemi dhe duke penguar procesin e përgatitjes së listave paraprake”, thuhet në njoftimin e DPGJC. Drejtoria e Përgjithshme e Gjendjes Civile ka detyrimin që deri më 27. 02. 2009 të reflektojë të gjitha ndryshimet e qendrave të votimit në Regjistrin Kombëtar të Gjendjes Civile, ndaj për të bërë të mundur këtë ajo i bën thirrje të gjithë të zgjedhurve vendorë që nuk kanë sjellë listat,  t’i sjellin ato sa më shpejt për të bërë të mundur vazhdimin normal të punës dhe realizimin e afateve të vendosura nga Kodi Zgjedhor.