A do të avancojë Ankaraja çështjen kurde?

Udhëheqësi i grupit kryengritës kurd, Partia e Punëtorëve të Kurdistanit, PKK, paralajmëron për kthimin e konfliktit në Turqi, në qoftë se qeveria e sapozgjedhur nuk plotëson kërkesat e këtij grupimi për autonominë e Kurdistanit.

Tema kryesore e fushatës zgjedhore ishte ekonomia, por çështja kurde mund ta devijojë përparimin politik të Turqisë.

Partia e Punëtorëve të Kurdistanit ose PKK ka bërë një luftë guerile 27 vjeçare për pavarësim nga Turqia.

Udhëheqësi i tyre i burgosur, Abdullah Ocalan, ka paralajmëruar se grupi do t’i kthehet konfliktit, nëse qeveria nuk fillon negociatat deri më 15 qershor.

Luftimet u kanë kushtuar me jetë më shumë se 40 mijë njerëzve, shumë prej tyre civilë.

Kjo është një çështje e mprehtë që ende dominon politikën turke.

Pas votimeve të së dielës, partitë pro-kurde po festojnë shtimin e numrit të deputetëve të tyre në parlament që arriti në 36, duke bërë që çështja kurde të avancojë në rendin e ditës.

Një nga deputetet e zgjedhur rishtas është Siri Syrja Onder, një regjisor i kinematografisë në Stamboll.

"Qeveria etiketon si terrorist çdo njeri, që bën pjesë në lëvizjen për lirinë e Kurdistanit. Personalisht, unë jam kundër vrasjeve dhe kundër luftës, madje do të doja që ajo të ndalej. Të dy palët duhet ta ndërpresin atë dhe të gjejnë një zgjidhje paqësore”, theksoi Onder.