A e njohu Mali Kosovën?

Kjo është deklarata që ka bërë sot presidenca e Republikës së Malit.

Deklarata është shkruar të enjten në mbrëmje pasi presidenca ka marrë informacionin se një dokument thotë se kjo republikë e ka njohur Kosovën, kurse është kumtuar sot.

“Presidenca dëshiron që në mënyrë kategorike ta mohoj këtë lajm fals i cili tenton ta shkatërroj imazhin e Malit”, thuhet në deklaratë, të cilën e transmeton Global Times.

"Rrjedhimisht, presidenca e Malit dëshiron të informojë gjithë komunitetin kombëtar dhe ndërkombëtar se presidenti nuk ka nënshkruar ende ndonjë dokument që njeh Republikën e Kosovës dhe rezervon të drejtën për të marrë masat e duhura për të identifikuar dhe ndëshkuar autorët e dokumentit të rreme", shkruan në fund të deklaratës.

Të premten e kaluar ishte zv.kryeministri Begjet Pacolli, që ka dhënë lajmin për njohje, ku edhe e ka prezantuar notën verbale të njohjes.

Madje Pacollli prezantoi notën verbale të nënshkruar nga presidenti i Malit, Dioncounda Traore, nëpërmjet të cilës ky shtet renditet në mesin e shteteve që deri më tani kanë njohur Republikën e Kosovës. Por nota verbale duket të jetë falsifikuar në kryeqytetin e Malit ose në atë të Kosovës.

Ndërkohë ka reaguar menjëherë edhe Zyra e Pacollit. Jetlir Zyberaj, këshilltar i zv.kryeministrit Begjet Pacolli ka mohuar për KTV-në raportimet se shteti afrikan Mali nuk e ka njohur Kosovën. Ai ka thënë se këto janë raporte të nxitura nga Serbia dhe miqtë e saj.

Ai tha se për këtë nuk ka dyshime pasi nota verbale është në MPJ. Por në MPJ, raporton KTV janë duke e verifikuar a është notë verbale zyrtare dhe për këtë arsyeje nuk duan ta publikojnë njohjen në uebfaqe. Kjo sipas tyre për të mos pasur dilema sic kishte pasur me Nigerinë.