Adriano i rikthehet golit

Më në fund, Adriano i është kthyer golit. Sulmuesi i Corinthiansit e ka shënuar golin e fitores për skuadrën e tij, në ndeshje me Botafogon. Sulmuesi brazilian është ndier mjaft i lumtur, pasi që nuk kishte shënuar gol për një kohë të gjatë.

“Më mungon ende diçka, por jam i qetë dhe i vetëdijshëm se më duhet të punoj shumë gjatë javës. Trajneri më qetëson duke më folur shpesh. Besimi i tij më bën të lumtur. Shokët e skuadrës më mbështesin në stërvitje, shpresoj t’ua shpaguaj këtë”, deklaroi pas ndeshjes ish sulmuesi i Flamengos, Interit, Parmës, Fiorentinës dhe Romës.

Kjo ishte paraqitja më e mirë e Adrianos që kur ishte transferuar në klubin brazilian. Adriano, aktualisht në mbipeshë, ishte lënduar vjet dhe nuk kishte mundur të luante në kampionatin Paulista për një kohë të gjatë.