Akreditohen dy ambasadorë

Presidenti Behgjet Pacolli ka pranuar të enjten letrat kredenciale nga dy ambasadorë të rinj, të cilët edhe u betuan në kabinetin e tij në një ceremoni solemne.

Ian Cliff është ambasadori i ri i Mbretërisë së Bashkuar në Kosovë, ndërsa Zoran Vodopija është ambasador i Kroacisë.

Presidenti Pacolli ka falënderuar përfaqësuesit e dy shteteve për ndihmën që kanë dhënë deri tani për Kosovën.

“Populli dhe institucionet e Kosovës falënderojnë shumë Mbretërinë e Bashkuar për çdo gjë që ka bërë, për mbështetjen që i ka dhënë formimit dhe forcimit të Republikës së Kosovës”, tha Presidenti Pacolli në takim.

Ndërsa ambasadori Ian Cliff tha se për Mbretërinë e Bashkuar, Kosova është një partner i rëndësishëm në rajonin e Ballkanit.

Ambasadori kroat në Prishtinë, Zoran Vodopija, duke ia përcjellë Presidentit Pacolli urimet e Presidentit të Kroacisë, Ivo Josipoviq, theksoi se Kroacia dhe Kosova kanë marrëdhënie shumë të mira dhe këto marrëdhënie do t’i zhvillojnë dhe zgjerojnë në të ardhmen edhe më shumë.