Aksident ujor në Filipine, 27 të zhdukur

Ekipet për kërkim dhe shpëtim vazhduan aksionin në ujërat e Gjirit të Manilës, në kërkim të 27 personave të zhdukur, pas përplasjes së një anije të udhëtarëve me një anije për peshkim, njoftoi sot roja detare e Filipineve.

46 udhëtarë dhe anëtarë të ekuipazhit të anijes së peshkimit u nxorën nga uji dhe u dërguan në selinë e rojës detare në Manilë, deklaroi zëdhënësi i rojës detare, Armand Balilo. Roja detare kërkoi nga anijet në rajon që edhe ato të angazhohen në kërkimin e personave të zhdukur.

Anija e udhëtarëve, e cila po barte 73 udhëtarë, ka qenë duke lundruar nga Manila në drejtim të ishullit jugperëndimor, Mindanao, u fundos menjëherë pas aksidentit, njoftoi Balilo. Anija kishte kapacitet që të bartë 126 persona.

Në anën tjetër, ekipet shpëtimtare arritën që të shpëtojnë që të gjithë 22 anëtarët e ekuipazhit të anijes për peshkim, e cila nuk u fundos pas aksidentit, the Melvin Viola, nga qendra për operacione e rojës detare.

Mbeti i paqartë shkaku i përplasjes mes dy anijeve. Aksidenti ndodhi në momentin kur me miliona filipinezë ishin nisur në drejtim të provincave të tyre, në prag të natës së Kërshëndellave.