Aksidentet shkaktojnë tre persona të plagosur

Aksidentet rrugore në Tiranë kanë shënuar dje tre të plagosur, të cilët ndodhen jashtë rrezikut për jetën. Burimet policore të kryeqytetit shpjeguan se seksioni i hetimit të aksidenteve rrugore dërgoi për ndjekje penale në gjendje të lirë Arjana Durbakun, 41 vjeçe, sepse në orën 14:30, në Rrugën e Elbasanit, duke drejtuar mjetin "Ford", me targa TR 9963 L, ka aksidentuar Gjyle Merallën, 60 vjeçe. E dëmtuara ndodhet në spital jashtë rrezikut për jetën. Ndërsa në orën 08:00 të mëngjesit, në Rinas, një motor i paidentifikuar ka aksidentuar këmbësorin Dhimitër Shqahu, 56 vjeç, banues në Shkozë, i cili ndodhet në spital jashtë rrezikut për jetën. Policia tha se autori është larguar me shpejtësi dhe mendohet se është banor i zonës. Aktualisht po punohet për identifikimin dhe kapjen e autorit. Policia shtoi se filloi procedimi penal në gjendje të lirë edhe për shtetasin Bujar Petrit Gjyzeli, 50 vjeç. Ky person, rreth orës 12:50, në Kombinat, duke drejtuar motorin Yamaha, me targë TR 7 A 13, ka dalë nga rruga e për pasojë është aksidentuar pasagjeri Petrit Mataj, 57 vjeç, banues në Tiranë, i cili ndodhet në spital jashtë rrezikut për jetën.