Alban Rexha,tre policët në prokurori

TIRANE - Tre efektivat e patrullës së policisë, e cila ndaloi më 29 dhjetor 2009 disa të rinj, mes të cilëve edhe Alban Rexha, u morën në pyetje nga Prokuroria e Krimeve të Rënda. Administrimi i dëshmive të policëve është bërë në kuadër të hetimit që po zhvillohet për akuzat e vrasjes së mbetur në tentativë, kryer nga të dyshuarit P.Serjani, 26 vjeç, Sh.Mejdani, 21 vjeç dhe E.Gega, 24 vjeç. Për këtë çështje është akuzuar dhe arrestuar edhe personazhi i njohur Alban Rexha, i cili bashkë me të tjerët akuzohet se ka qëlluar me armë ndaj policëve, pasi forcat e rendit tentuan ndalimin e tyre. Tre policët që u morën në pyetje në prokurori, pohuan se kanë qenë objekt i të shtënave me armë nga të rinjtë. Ngjarja ndodhi më 29 dhjetor 2009, pasi policia tentoi të ndalonte makinën me targa BOT QA 997, me të cilën lëviznin të rinjtë.