Ambasadori u vra për shkak të filmit për Muhamedin?

(E plotësuar) “Pafajësia e Myslimanëve” quhet filmi që është prodhuar nga disa egjiptianë të krishterë (koptë) me banim në SHBA, e që është bërë shkak mobilizimesh anti-amerikane në disa vende të Lindjes së Mesme (është një film 120 minutësh, në të cilin profeti Muhamet përshkruhet si një i çmendur, mashtrues, i dhënë pas femrave e pedofil).

Në njërën prej protestave, në atë të Libisë, kanë vrarë ambasadorin amerikan, dhe diplomatë të tjerë, gjë që ka provokuar shqetësim e alarm në SHBA. Është një ngjarje që mund të ketë ndikim dhe në fushatën elektorale, gjë që u vu re menjëherë pasi u mor vesh ajo që kish ndodhur në Bengasi.

Stafi i kandidatit Romney doli me një deklaratë, ku thuhej: “Në reagimin e parë të administratës së Obama-s, në vend që të dënohej sulmi i bërë mbi ambasadën amerikane, u shpreh simpati ndaj agresorëve, dhe kjo është e padenjë”.

Shtëpia e Bardhë ka shprehur simpati për agresorët? Në fakt, ky është një lexim që grupi i Romney-t i bën asaj pjese të deklaratës së Obama-s, ku pasi dënohej sulmi, kërkohej respekt për fetë e besimet fetare. Duket i sforcuar si lexim, apo jo? Dhe kemi të bëjmë me impaktin më të parë të kësaj ngjarjeje në fushatë. (respublica.al)

Vritet ambasadori amerikan në Libi

Ambasadori Amerikan në Libi, Chris Stevens dhe 3 funksionarë të lartë të Konsullatës Amerikane humbën jetën në sulmin që iu bë selisë diplomatikë të SHBA-së në Bengazi.

Lajmi u përhap nga televizioni ‘Al Jazeera’.

Qindra manifestues sulmuan të martën në mbrëmje, me armë e granata, Konsullatën Amerikane në qytetin lindor të Libisë, Bengazi, për të kundërshtuar një film, që sipas tyre ofendon Islamin. Filmi i realizuar nga Sam Bacile titullohet ‘Pafajësia e Myslimanëve’ dhe tregon jetën e Profetit Muhamed.

Demonstrata antiamerikane kundër filmit u zhvilluan edhe jashtë Ambasadës Amerikane në kryeqytetin e Egjiptit, Kajro. Protestuesit në të dy vendet thonë se filmi i prodhuar në Shtetet e Bashkuara është fyes për profetin Muhamed.

Të paktën 2.000 demonstrues u mblodhën jashtë ambasadës në kryeqytetin egjiptian. Disa protestues hipën mbi mur, ulën flamurin amerikan dhe e zëvendësuan atë me një flamur islamik.

Raportet e medieve thonë se filmi rreth profetit Muhamed u financua nga anëtarët e grupit të mërgimtarëve kopt të krishterë të Egjiptit. Nuk është ende e qartë nëse të dyja sulmet kanë qenë të koordinuara.

Sekretarja amerikane e Shtetit, Hillary Clinton, konfirmoi se një oficer i Departamentit Amerikan të Shtetit është vrarë gjatë dhunës, duke shtuar se “disa kanë dashur që të justifikojnë këtë sjellje si një përgjigje ndaj një materiali ofendues të postuar në internet”.

Në një deklaratë, Clinton tha se Shtetet e Bashkuara “shprehin keqardhjen për çdo përpjekje të qëllimshme për denigrimin e besimit fetar të të tjerëve", por shtoi se “nuk ka ndonjë justifikim për veprimet e dhunshme të këtij lloji.”

Ndërsa, zëdhënësja e Departamentit Amerikan të Shtetit, Viktoria Nuland, tha se SHBA e dënon ashpër sulmin, dhe po punon me forcat libiane të sigurisë për të siguruar ndërtesën.

Banorët e Bengazit të intervistuar afër konsullatës së shkatërruar amerikane, kanë thënë se sulmi është rezultat i zemërimit në lidhje me filmin.

“Libianët nuk duan që dikush të thotë diçka të keqe mbi profetin e tyre. Profeti Muhamed nuk është Osama bin Laden. Ai nuk është kushdo qoftë. Ai është profeti ynë”, ka thënë një qytetar i Bengazit.

Edhe protestuesit në Kajro dënuan filmin. Një protestues, Hosam Jusef Ismail, e ka dënuar poshtërimin e profetit islamik nën pretekstin e lirisë së shprehjes.

“Nuk është e drejtë që një njeri të ketë të drejtë të bëjë çka do. Kjo do të ishte kundër interesave të një personi tjetër. Nuk ekziston një gjë e tillë si liria e pakufizuar. Edhe liria ka kufij. Bindjet themelore fetare duhet të respektohen nga të gjithë në botë. Ne jemi kundër këtij filmi, ne kemi dëgjuar se e fyen profetin, paqja qoftë mbi të, edhe pse unë personalisht nuk e kam parë atë. Por, ne jemi duke u përpjekur që të dërgojmë një mesazh në tërë botën se ne, si myslimanë, i kemi vijat e kuqe, dhe se ne kemi besimet themelore. Nëse mediat përpiqen që të na bëjnë të devijojmë nga besimet tona thelbësore, ne kurrë nuk do ta bëjmë një gjë të tillë”, tha Ismail.

Ambasada e SHBA-së lëshoi një deklaratë që dënon “përpjekjet e vazhdueshme nga individë të këshilluar keq, që lëndojnë ndjenjat fetare të myslimanëve.

Në deklaratë thuhet se “Ambasada fuqimisht kundërshton veprimet e atyre që abuzojnë me të drejtën universale të fjalës së lirë për të lënduar besimet fetare të të tjerëve.”

Sam Basil, një izraelito-amerikan që merret me patundshmëri nga Kalifornia, tha se ai e ka prodhuar dhe drejtuar filmin.

Agjencia e lajmeve Associated Press citon Basilin të ketë përshkruar se si të krishterët koptë janë shtypur në Egjipt.

Ministri Hoxhaj dënon sulmin mbi misionin amerikan në Bengazi të Libisë

Ministri i Punëve të Jashtme i Republikës së Kosovës, Enver Hoxhaj, përmes një telegrami ka ngushëlluar Sekretaren Amerikane të Shtetit, Hillary Clinton, pas sulmit mbi misionin amerikan në Bengazi të Libisë, ku bëhet e ditur se kanë mbetur të vdekur Ambasadori amerikan Christopher Stevens, Zyrtari i Shërbimit të Jashtëm, Sean Smith dhe dy njerëz të tjerë.

Në telegram, Ministri Hoxhaj shpreh pikëllimin e qytetarëve të Kosovës për këtë lajm, duke theksuar solidaritetin e plotë të institucioneve dhe popullit të Kosovës me popullin dhe autoritetet amerikane si dhe me familjarët e viktimave të këtij sulmi terrorist.

Në telegram, Ministri Hoxhaj e dënon në mënyrën më të ashpër të mundshme këtë sulm të tmerrshëm të kryer mbi misionin amerikan, duke shprehur besimin se kryerësit e tij do të gjenden dhe të marrin ndëshkimin e merituar.