Anëtarët e Kolegjit Zgjedhor betohen përpara Presidentit Topi

Anëtarët e Kolegjit Zgjedhor, të votuar vetëm një ditë më parë nga KLD-ja, janë betuar gjatë paradites së djeshme përpara Presidentit të Republikës, Bamir Topi. Në mjediset e Pallatit të Brigadave u zhvillua ceremonia e betimit të tetë gjyqtarëve të rinj të Kolegjit Zgjedhor të Gjykatës së Apelit Tiranë. Anëtarët Astrit Kalaja, Dhurata Haveri, Entela Prifti, Marie Qirjazi, Meriban Mullaj, Petraq Koço, Sashenka Jonuzi dhe Tom Ndreca u betuan para Presidentit të Republikës. Pas ekzekutimit të Himnit kombëtar dhe leximit të tekstit të betimit nga sekretari i Përgjithshëm, Aleksandër Flloko, gjyqtarët u betuan përpara Presidentit të Republikës me fjalët: “Betohem solemnisht se do të respektoj, do të mbroj dhe do t’i bindem Kushtetutës dhe ligjeve të Republikës së Shqipërisë, se do të respektoj të drejtat dhe liritë e qytetarëve dhe do të përmbush detyrat e mia. Betohem se do të kryej detyrën time me të gjitha mundësitë e mia dhe në mënyrë të paanshme, të drejtë dhe pa favorizuar ndonjë person ose parti”. Të pranishëm në ceremoninë e betimit ishin kryetarja e Gjykatës së Lartë Shpresa Beçaj, Avokati i Popullit Ermir Dobjani, anëtarët e Këshillit të Lartë të Drejtësisë dhe anëtarë të kabinetit të Presidentit të Republikës.

21 Janar 2009