Anëtarët e PS-së: Konsensus ose largohemi nga KQZ

Rrugës së Lirisë i kthehet lista, sepse nuk ka përfaqësim burrash

TIRANË- Çdo ditë e më shumë Komisioni Qendror i Zgjedhjeve po kthehet në një institucion tërësisht politik dhe aspak teknik.

Ndryshimi i formës së kompozimit të këtij institucioni me amendimin që iu bë Kushtetutës një vit më parë, ka sjellë një efekt negativ në funksionimin e tij, sidomos në aspektin vendimmarrës, ku anëtarët e tij janë kthyer në zëdhënës të qëndrimit të forcave politike që dhe i kanë propozuar.

Kjo gjë ka rritur shumë ditët e fundit temperaturën në marrëdhëniet jo vetëm mes përfaqësuesve të forcave politike, por edhe mes vetë anëtarëve të KQZ-së.

Kështu, pas largimit një ditë më parë të përfaqësuesit socialist nga mbledhja e KQZ-së, në shenjë proteste për vendimmarrjen e të gjitha vendimeve pa konsensusin e palëve, dje, i njëjti precedent, megjithëse me doza më të zbutura, është përsëritur edhe mes vetë anëtarëve të këtij institucioni.

Ka qenë anëtari i PS-së në KQZ, Artan Lazaj, ai që ka paralajmëruar kryetarin e këtij institucioni se anëtarët e majtë do të largohen nga mbledhjet, në rast se kolegët e djathtë do t'u imponoheshin në vendimmarrje, gjithmonë me forcën e kartonit.

Sipas tij, vendimet duhet të merren me konsensus dhe se duhet të jenë shumë të pakta rastet kur ato duhet të merren edhe pa pëlqimin e njërës apo tjetrës palë.

"Ne kemi kërkuar konsensus dhe konsensus do të thotë më shumë arsyetim nga të dyja palët. Ne e dimë raportin e votave 3 me 4 në komision, por nuk besoj se është kjo rruga që duhet ndjekur.

Në të kundërt, në rast se do të vazhdoni kështu, nuk do na mbetet tjetër veçse të largohemi nga KQZ-ja dhe të kthehemi vetëm për vendimet që kërkojnë një shumicë të cilësuar votash", - tha Artan Lazaj.

Ndërkohë që, edhe pas këtij kërcënimi, kryetari i KQZ-së ka vazhduar mbledhjen duke rrëzuar kërkesën e të majtëve për të rrëzuar listat e atyre partive që nuk plotësojnë kriteret ligjore.

Më pas, mbledhja ka vijuar me shqyrtimin e listave shumemërore të gjashtë subjekteve politike, duke kthyer për plotësim dokumentacioni 5 prej tyre dhe duke miratuar vetëm Partinë e Emigrantëve.

Gjatë mbledhjes së djeshme u shënua një rast aspak i zakontë për klasën politike shqiptare, ku Partisë Rruga e Lirisë iu kthye dokumentacioni, pasi në listën e saj shumemërore, për qarkun e Korçës, kishte paraqitur vetëm 1 kandidat mashkull, ndërsa gjithë të tjerat femra, duke mos respektuar kështu përcaktimin që bën Kodi Zgjedhor, për të pasur minimumi 30 për qind përfaqësim nga secila gjini.