Antonio Kasano sulmon trupën televizive

Një Cassanata përpara Krishtlindjeve nuk mund të mungonte. Episod negativ për Antonio Kasanon që ka sulmuar dhe fyer gojarisht një trupë televizive në Gjenovë. Sulmuesi i Milanit, i bindur se ishte objekti i filmimeve, iu vërsul kameramanit duke e shtyrë. Gazetarja e TeleNord ka provuar që t’i shpjegojë Kasanos se po kryente një mbulim tjetër, por lojtari ka vijuar ta ofendojë. Gjithçka ka ndodhur përpara një lokali në Gjenovën e Pestë, ku trupa televizive ishte aty për të zhvilluar një sondazh për rubrikën “Zëri”. Kur gazetarja dhe operatori po mbyllnin punët e tyre, futet në skenë Antonio Kasano. Fantazisti barez zbriti nga makina e tij dhe iu vërsul operatorit, që në atë moment e kishte fikur kamerën. Të shumtë ishin ata që u futën në mbrojtje të trupës televizive, pasi Kasano po e kërcënonte kameramanin se “do t’ia thyente turinjtë”. Gazetarja rrëfen se “kamera ishte e fikur dhe se Kasano e sulmoi pa të drejtë operatorin tim. Tani ai duhet të na kërkojë falje”. Kasano u operua në kokë pas një iktusi ishemik dhe do të qëndrojë larg fushave për një periudhë disa mujore. Fakti se shëndeti i tij u kthye në qendër të vëmendjes, mund ta kenë detyruar lojtarin e Milanit që të reagojë keq.