Anxhaku, sërish president i Çiklizmit me 100% të votave

Skënder Anxhaku rizgjidhet për një mandat të dytë si president i Federatës Shqiptare të Çiklizmit. Dhe, një gjë të tillë e ka bërë në mënyrën më bindëse, pasi ka fituar 100% të votave të mundshme. Federata e Çiklizmit ka zhvilluar dje paradite Asamblenë e saj Zgjedhore, e cila ndryshe nga Asambleja e Mundjes dhe ajo e Komitetit Olimpik Kombëtar Shqiptar, u zhvillua normalisht, duke treguar një shembull për federatat e tjera dhe për vetë Komitetin Olimpik. Pas paraqitjes së raportit teknik dhe financiar të aktiviteteve të bëra deri tani nga kjo federatë, u kalua në diskutime dhe më pas në votimin për president. Numërimi i votave të hedhura në kuti nxori fitues ish-presidentin Anxhaku, në favor të të cilit shkuan të 12 votat e drejtuesve të 12 klubeve të pranishme në këtë asamble. Në këtë mënyrë, ai ka përfituar edhe mandatin e dytë për të udhëhequr këtë federatë. Të pranishëm në Asamble kanë qenë edhe përfaqësues të Ministrisë së Turizmit, Kulturës, Rinisë dhe Sportive (MTKRS), të cilët kanë ndjekur procesin zgjedhor.