Ardit Gjebrea në pritje për t’u bërë baba për herë të dytë

 

ornela caci

Lajmi është befasues por edhe shumë i bukur. Kantautori i njohur Ardit Gjebrea pret të bëhet baba për herë të dytë. Dhe në ndryshim nga të gjitha zakonet alla shqiptare sipas të cilave “nëse ke ndër mënd të bësh fëmijë, bëji shpejt e shpejt”, duket se çifti ëndrrën në sirtar për të patur një fëmijë tjetër, e kanë mbajtur si të tillë deri në momentin e përshtatshëm për ta bërë realitet. Dhe ja ku na vjen sot lajmi se Anila është tre muajshe shtatzënë dhe në familjen Gjebrea ka një atmosferë të papërshkruar gëzimi. Familja Gjebrea e ka pohuar ekskluzivisht këtë lajm për “Panorama Plus”, duke mos preferuar të japë detaje të mëtejshme për të ruajtur privatësinë familjare. Nëpër intervista të ndryshme Arditi gjithmonë ka shprehur dëshirën për të pasur edhe një fëmijë tjetër, ndërkohë që Joni rritej duke u bërë një burrë në familjen Gjebrea, kështu që një fëmijë i vogël, dukej se mungonte në atë shtëpi. Mirëpo pohimi më i fundit i Gjebreas tek revista “Psikologji” ku ai tregonte se kishte arritur një ekuilibër, pas një momenti reflektimi, na bën të mendojmë se kjo periudhë i ka shërbyer për të vendosur përfundimisht ardhjen në jetë të një fëmije tjetër. Ai ka treguar gjithmonë që prioritet janë familja e tij, mamaja, bashkëshortja e i biri dhe një burrë si ai që sapo i ka kaluar të 40-at, mesa duket,  më shumë se gjithçka, dëshiron një jetë të qetë e të stabilizuar, por edhe një familje të madhe.
Dobësia e Arditit
për Jonin
Gjithmonë e ka thënë që Joni është gjithçka për të dhe tani që ai ka hyrë për 18 vjeç, i është bërë si shok. Me siguri jo vetëm Arditi dhe Anila, por edhe Joni po e përjeton me shumë gëzim një nga momentet më të bukura në jetën e tij, ardhjen në jetë të një vëllai ose motre të vockël.
Një 20-vjetor si ky
Duket sikur Arditi dhe Anila e kanë bërë gjithçka të kalkuluar deri në detaje. Pasi ky fëmijë vjen pikërisht në kohën kur çifti Gjebrea mbush 20 vite njohje dhe siç është shprehur vetë kantautori, ai do të bënte një festë në fund të shtatorit, kohë kur ai së bashku me të shoqen u njohën dhe u dashuruan.
Gjebrea ne ekran çdo të dielë
Do të ndajë me teleshikuesit të gjitha të dielat në Tv Klan, një program që do të zgjasë rreth pesë orë dhe me siguri lajmin e ardhjes në jetë të bebit ka për të na e dhënë vetë ai nga ekrani pasi sipas disa përllogaritjeve i bie që fëmija të lindë në shkurt ose në mars të vitit 2009. E meqë jemi tek përvjetoret, edhe “Kënga Magjike”, këtë vit e ka të veçantë pasi mbush 10 vjeç. Gjebrea është një nga artistët më me famë jo vetëm në trojet shqiptare, por edhe jashtë Shqipërisë. Kantautori i njohur tërheq vëmendjen e fansave të tij edhe gjatë kohës kur është me pushime jashtë shtetit, ku adhurues të të të gjitha moshave i kërkojnë autografe.