Arrestohet në Lezhë autori i dytë i vjedhjes së filialit të një banke

Forcat e policisë së Lezhës arrestuan sot autorin e dytë të akuzuar për vjedhjen e një sasie të konsiderueshme lekësh tre punonjësve të Postës Shqiptare, që sapo kishin dalë nga filiali i Bankës Kombëtare Tregtare në Lezhë, në 12 mars të këtij viti. Burime zyrtare nga policia e Lezhës konfirmuan se 30 vjeçari Enver Diva, nga Mamurrasi, u arrestua në një mal, afër qytetit të Lezhës, ku ai qëndronte i fshehur prej disa ditësh. Sipas burimeve të mësipërme, mësohet se 30 vjeçari Diva, i identifikuar si autor i së shtënës me armë në ajër gjatë grabitjes së bankës, sapo kishte mbaruar dënimin e dhënë më parë me 12 vjet heqje lirie për "vjedhje me armë". Më 12 mars të këtij viti tre persona të armatosur dhe të maskuar vodhën nën kërcënimin e armëve një sasi të madhe parash, të cilën tre punonjës të filialit të Postës Shqiptare në Lezhë, e kishin tërhequr në filialin e BKT-së këtë qytet. Policia identifikoi dhe arrestoi më 24 mars shtetasin Elton Gjini.  Ndërkohë, policia ka identifikuar dhe ka shpallur në kërkim edhe autorin tjetër të kësaj vjedhjeje, shtetasin Florind Marku.