Arti islamik në Louvre

Muzeu parisien Louvre synon që së shpejti të hapë një departament të ri – atë të artit islamik. Projekti ka filluar në vitin 2005, kur drejtorët e Louvre vendosën të ndërtonin një krah që do t’i kushtohej koleksioneve të mëdha të artit islamik.

“Tërë struktura duket sikur lundron në ajër. Nuk ka shtylla, dhe kjo është një sfidë e madhe”, thekson arkitekti Mario Bellini.

“Zgjodhëm fjalën Islam me germën e madhe ‘I’, sepse dëshirojmë të flasim rreth botës së Islamit. Në arabisht quhet ‘Dawlat al-Islam’, ose Perandoria e Islamit”, sqaron Sophie Makaroi, drejtoreshë e departamentit të artit islamik.

Sipas arkitektëve, ndërtesa do të lejojë mjaft dritë për ndriçimin e veprave brenda me dritë natyrale, por edhe duke i mbrojtur ato nga rrezet direkte të diellit. Donatori më i madh i projektit ishte një princ saudit, që kontribuoi me 17 milionë euro. Për përfundimin e plotë të punimeve nevojiten edhe 10 milionë euro shtesë.

Galeria, që ka 2800 metra katrorë, për publikun do të hapet gjatë kësaj vere.