Artistët ballafaqohen me klimën

Në bashkëpunim me konferencën për klimë, e cila u mbajt në vitin 2009 në Kopenhagë, një grup prej 25 karikaturistëve nga shtetet nordike treguan mendime argëtuese por edhe mendime shqetësuese për ndryshimet klimatike.

Me qëllim që të ilustrohet angazhimi aktiv në këtë fushë, Instituti suedez përgatiti ekspozitën me titullin “Ballafaqimi me klimën“, e cila u hap të enjten mbrëma në hapësirën Tetris. Ky projekt ka për qëllim të nxisë diskutim për çështjen e zhvillimit të qëndrueshëm të shoqërisë dhe për të rritur vetëdijen për problemet e lidhura me mbrojtjen e mjedisit.

Projekti “Ballafaqimi me klimën” është rezultat i bashkëpunimit mes Tetrisit, Institutit Suedez, Ambasadës së Suedisë dhe karikaturistëve nga Suedia, Franca, Shqipëria, Kosova, Maqedonia, Mali i Zi, Serbia, Kroacia, Bosnja dhe Hercegovina me temë ndryshimet klimatike.

Karikaturistët që morën pjesë në ekspozitë ishin: Love Anteli – Suedi, Magnus Bard – Suedi, Riber Hansson – Suedi , Helena Lindholm – Suedi , Karin Sunvisson – Francë, Mentor Llapashtica – Kosovë, Agim Sylaj – Shqipëri, Mihajllo Dimitrievski – Maqedoni, Darko Drjevik – Mali I Zi, Sasha Rakeziç – Serbi, Nina Hashiç – Bosnje dhe Hercegovina, Igor Hofbajer – Kroaci.