Austria dhe Shqipëria firmosin një memorandum për vizat
Vjenë, 29 janar, NOA - Mbështetja për
liberalizimin e vizave dhe perspektivën europiane të Shqipërisë janë bërë pjesë
e një memorandumi mirëkuptimi, nënshkruar në Vjenë mes Shqipërisë dhe Austrisë.
Konfirmohet për agjencinë e Lajmeve NOA se memorandumi i mirëkuptimit lidhur me
forcimin e bashkëpunimit në fushën e sigurisë së brendshme u nënshkrua nga ministri
i Brendshëm Lulzim Basha dhe homologia austriake Maria Fekter. Nga ana tjetër, Basha dhe Fekter nënshkruan
gjithashtu edhe një marrëveshje mes dy vendeve tona mbi ndihmën e ndërsjelltë
në rast të katastrofave dhe fatkeqësive të mëdha. Në këtë kontekst, Basha
shprehu edhe falënderimin për ndihmën e qeverisë austriake për përballimin e
emergjencës civile të shkaktuar nga përmbytjet natyrore në qarkun e Shkodrës
dhe Lezhës.
Por ministri i Brendshëm gjatë takimit me homologen
e tij austriake e informoi atë edhe mbi progresin e Shqipërisë në fushën e
sigurisë së dokumentave, duke sjellë ndërkohë në vëmendje dhe duke falënderuar
qeverinë austriake për ndihmën dhe asistencën e vazhdueshme të dhënë në këtë
drejtim.
Basha theksoi se rreth 460 mijë aplikime të
deritanishme dhe standartet më të larta ndërkombëtare që zotërojnë pasaportat
biometrike shqiptare, janë tregues të qartë se Shqipëria është në pozita më të
konsoliduara se të gjithë vendet e rajonit, përfshirë vendet që përfituan
liberalizimin e vizave me BE fundvitin e kaluar, në fushën e pajisjes së
qytetarëve me dokumente të sigurta.
Ndërsa ministrja Fekter e cilësoi të
suksesshëm përparimin e Shqipërisë në lëmin e përmbushjes së kritereve të
udhërrëfyesit për liberalizimin e vizave.
Shqipëria ka bërë shumë përparime në
plotësimin e kushteve për heqjen e vizave. Ekipet e ekspertëve janë të bindur
dhe kanë vlerësuar suksesin e vendit tuaj lidhur me sigurinë e dokumenteve, e
konkretisht me procesin e pajisjes së qytetarëve me pasaporta biometrike. Unë
jam e bindur se ky sukses i arritur do të vlerësohet dhe shqiptarët do të
lëvizin shumë shpejt pa viza, deklaroi ajo.
n.e/NOA