Banega shkelet nga vetura e tij

Mesfushori i Valencias, Ever Banega do të qëndrojë deri në gjashtë muaj jashtë fushës si rezultat i frakturës në nyje të këmbës të pësuar gjatë një aksidenti bizar të shtunën.

Mediet spanjolle kanë njoftuar se Banega pësoi dëmtim të rëndë, pasi kishte ndalur veturën në një pompë të benzinës. Ai harroi të tërheqë frenin e dorës para daljes nga vetura, kurse ajo u kthye prapa dhe e shkeli atë në nyjën e këmbës.

“Futbollisti Ever Banega ka pësuar një aksident me veturën e tij pas stërvitjes të dielën dhe ka marrë traumë në këmbën e tij të majtë, që i ka shkaktuar frakturë. Periudha e rikuperimit vlerësohet të jetë rreth gjashtë muaj”, thuhet në komunikatën e Valencias.

Reprezentuesi argjentinas nuk ishte i ftuar për ndeshjen kundër Barcelonës në Nou Camp të dielën, pasi vuante nga një dëmtim në gju. Valencia është e treta në La Liga dhe takohet me Stoke Cityn në duelin e kthimit të fazës eliminatore të Europa Leagues të enjten.