Bankinat milionëshe

Manchester City dhe Chelsea kanë bërë shpenzime marramendëse në vitet e fundit. Të dyja ekipet angleze kanë shpenzuar qindra miliona euro për të blerë lojtarë. Mirëpo, ajo që i veçon këto dy skuadra është bankina. Në përballjen e tyre të hënën, në bankinë qëndruan lojtarë që kushtuan në total 262,6 milionë euro, një shifër rekorde kjo.

Pas fillimit të kampionatit me një seri të shkëlqyeshme prej 14 ndeshjesh pa humbje, Manchester City i Roberto Mancinit më në fund u njoftua me humbjen e parë në Premierligë.

‘Citizens’ u ndalën nga Chelsea, i cili fitoi 2:1, edhe pse ekipi i italianit po udhëhiqte qysh në fillim me golin e Mario Balotellit. Mirëpo, një gol i Raul Meireles dhe një tjetër i Frank Lampard nga penalltia e gjunjëzuan kryesuesin e Premierligës.

Mirëpo, fundi i serisë së pamposhtësisë së ‘Citizens’ nuk ishte fakti i vetëm interesant i ndeshjes që u zhvillua në stadiumin ‘Stamford Bridge’. Kjo ndeshje Chelsea-Manchester City në fakt do të kujtohet për një rekord të jashtëzakonshëm, atë të bankinave më të kushtueshme në histori të futbollit.

Në vazhdën e shpenzimeve të ‘çmendura’ të Abramovich e Mansour gjatë periudhës së tyre në presidencën e Chelseas dhe Cityt, ata kanë blerë shumë lojtarë kualitativë dhe një pjesë e mirë e tyre kanë përfunduar në bankinë për shkak të konkurrencës së fortë.

Ndër ta, Fernando Torres është shembulli më i mirë, por natyrisht se nuk është i vetmi. Nëse e bëjmë një llogari të shpejtë, në derbin e xhiros së 15-të në bankinë përfunduan 262,6 milionë euro, një shifër rekorde kjo.

Lojtarët disa milionësh që përfunduan në bankinë

Chelsea (total 141,1 milionë euro)

Ross Turnbull – 0 (erdhi nga Middlesbrough, 2009)

Paulo Ferreira – 20 milionë euro (Porto, 2004)

Obi Mikel – 23,6 (Lyn Oslo, 2006)

Frank Lampard – 16 (West Ham, 2001)

Florent Malouda – 19 (Lyon, 2007)

Salomon Kalou – 4 (Feyenoord, 2006)

Fernando Torres – 58,5 (Liverpool, 2011)

Manchester City (total 121,5 milionë)

Costel Pantilimon – 0,3 (Poli Timisoara, 2011)

Stefan Savic – 12 (Partizan, 2011)

Kolo Toure – 18,7 (Arsenal, 2009)

Nigel De Jong - 18 (Hamburg, 2009)

Samir Nasri – 27,5 (Arsenal, 2011)

Adam Johnson – 8 (Middlesbrough, 2010)

Edin Dzeko – 37 (Wolfsburg, 2011)

Totali: 262,6 milionë