Barca ka respekt per elesin

Ajo mbrëmje maji e vitit 2009 nuk harrohet lehtë në Londër, por mbahet mend mirë edhe në Barcelonë. Trajneri i katalanasve, Pep Guardiola, ka fituar respekt të madh për Çelsin, në radhë të parë pikërisht prej asaj përballjeje, e cila pati shumë polemika brenda për shkak të gjykimit që dëmtoi blutë, ndërsa kampionët e Europës mbajnë mend më shumë golin e Iniestës që i kualifikoi për në finale.

“Mbaj mend se përballja e fundit e jona me Çelsin ishte shumë e vështirë. Në takimin e parë, anglezët u mbrojtën shumë mirë, në të dytën, luajtën shumë fort dhe na shpëtoi portieri. Në fund shënuam një gol të madh. Ka kaluar një kohë e gjatë dhe nuk mendoj se Çelsi do të luajë për hakmarrje, por për të dalë në finalen e Championsit. Mendoj se Çelsi është e njëjta skuadër si atëherë, pasi kanë bërë pak ndryshime. Unë e admiroj këtë brez lojtarësh, do të jetë një përballje emocionuese”-deklaroi Guardiola.

Ish-kapiteni i Arsenalit, Sesk Fabregas, gjithashtu ka vlerësim të lartë për kundërshtarin, por edhe për ekipin e tij.
“Është e qartë se goli i Iniestës në 2009-ën do të jetë në mendjen e lojtarëve të Çelsit. Do të jetë e vështirë dhe ata do të jenë të motivuar pas asaj që ndodhi 3 vjet më parë. Veçse, edhe ne jemi të fortë dhe mund të shënojmë në çdo moment”- u shpreh Fabregas
“Stamford Bridge” pret sfidën dhe Barcelona do të luftojë fort për trofeun që ka më pranë këtë edicion, pasi në kampionat nuk ka asgjë të sigurt.