Barcelona nuk është robot

Pas më tepër se 150 paraqitjeve me Barcelonën, Sergio Busquets tashmë duket si një veteran kur diskuton paraqitjet e ekipit dhe bënë thirrje për kujdes. Gjiganti katalan mposhti Mallorcan 5-0 të shtunën dhe ishte kjo hera e 14-të që skuadra regjistron fitore me këtë rezultat të thellë nën drejtimin e trajnerit Pep Guardiola.

Por, Busquets paralajmëron se ekipi mund të ketë edhe përballje të vështira sikurse ajo përballë Granadas ku fituan me rezultat minimal 1-0. “Nuk është lehtë. Ne nuk jemi robotë as makina. Nganjëherë gjërat shkojnë mirë ose keq. Të shënojmë pesë gola dhe të mbajmë portën e pamposhtur është gjithmonë mirë” tha ai për uebfaqen zyrtare të Barcelonës.

“Tifozët janë mësuar me fitoret tona të shpeshta por nuk mund të fitojmë gjithmonë 5-0. Gjëja kryesore është të luajmë mirë dhe kur nuk e bëjmë këtë, të mundohemi të përmirësohemi”, shtoi reprezentuesi spanjoll. Busquets lavdëroi kontributin e sulmuesit Lionel Messi i cili ka realizuar 13 gola në 10 xhiro në La Liga.

“E dimë se Messi është futbollisti më i mirë në botë, ai është lider i këtij ekipi dhe ai që e bënë dallimin në fushë” përfundoi Busquets.