Barroso: Kriza e borxhit po sfidon BE-në

Presidenti i Komisionit Evropian, Hose Manuel Barroso, tha se kriza e borxhit paraqet “sfidën më të madhe” në historinë e Bashkimit Evropian.

Në adresimin e tij para Parlamentit Evropian, Barroso tha se ishte e mundur të kapërcehej kriza.

“Po përballemi me ndikime negative të një rivlerësimi global mbi rreziqet. Është përgjegjësi e jona të rindërtojmë besimin në euro dhe në gjithë unionin në tërësi”, tha Barroso, i cili theksoi nevojën e një unifikimi më të madh për mbijetesën e BE-së.

Fjalimi i tij vjen në kohën kur vendet e Bashkimit Evropian vazhdojnë të përballen me trazira ekonomike, ndërkohë që janë rritur shqetësimet edhe për stabilitetin e valutës euro.