Basha: Bashkia, përgjegjësi të plotë për akses më të madh të librit në Tiranë

Kryetari i Bashkisë merr pjesë në inaugurimin e bibliotekës së Shkollës në Universitetin Amerikan të Tiranës

Kryetari i Bashkisë së Tiranës Lulzim Basha mori pjesë në ceremoninë e inaugurimit të bibliotekës së Shkollës në Universitetin Amerikan të Tiranës. Kjo bibliotekë ka një fond prej 50 mijë librash, duke qenë kështu biblioteka universitare më e madhe në vendin tonë dhe ndër më të mëdhatë e këtij lloji në rajon. Brenda janarit kësaj biblioteke do t’i shtohet dhe një kontigjent tjetër me 25 mijë libra. I gjithë ky fond është dhuratë e organizatës amerikane “International Book Project” me mbështetjen e USAID. Ky universitet i ka dhuruar Bashkisë së Tiranës në mbështetje të projektit të kryetarit të Bashkisë për ngritjen e një biblioteke bashkiake, një fond prej 3 mijë librash. Kryetari i Bashki së Tiranës Lulzim Basha tha se “kjo bibliotekë eshtë dëshmia më e qartë e ritmeve me të cilat bota universitare dhe shoqëria shqiptare po ecen  drejt objektivave që i kemi vënë vetes, si një shoqëri e gatshme, e denjë dhe me energji e potencial të plotë, për të realizuar integrimin europian, në çdo dimension të tij”.
Zoti Basha, duke sjellë në vëmendje angazhimin e tij gjatë fushatës për ngritjen e një biblioteke bashkiake tha se :“Bashkia do të marrë përgjegjësi të plota, për një akses sa më të madh dhe më të pasur ndaj librit në qytetin e Tiranës, por Bashkia nuk mund të anashkalojë, as të mbyllë sytë apo të tregohet indiferente ndaj energjisë së jashtëzakonshme që përfaqëson bota universitare në Tiranë”.