“Bashkëpunimi mes Shqipërisë dhe Greqisë, në funksion të aspiratave të integrimit”

Kryeministri Sali Berisha takon Sekretarin e Përgjithshëm të Ministrisë së Jashtme të Greqisë, Yannis-Alexis Zepos

Shqipëria dhe Greqia do intensifikojnë urat e bashkëpunimit në funksion të proceseve të integrimit Evropian si dhe konsolidimit të paqes dhe sigurisë rajonale. Kjo është konfirmuar dje gjatë takimit që kryeministri Sali Berisha zhvilloi me sekretarin e Përgjithshëm të Ministrisë së Jashtme të Greqisë, Yannis-Alexis Zepos. Në takim u diskuan çështje të bashkëpunimit dypalësh dhe u rikonfirmuan marrëdhëniet e shumë të mira mes të dy vendeve, angazhimi i  të dyja palëve për të zhvilluar marrëdhënie të shkëlqyera miqësore e të fqinjësisë, si dhe për të konsoliduar bashkëpunimin në të gjitha fushat, si në aspektin dypalësh ashtu edhe në kuadër të procesit të anëtarësimit të Shqipërisë në Bashkimin Europian.
Haxhinasto- Zepos: “Shqipëria dhe Greqia do konkretizojnë edhe më tej marrëdhëniet e fqinjësisë së mirë”/Zëvendëskryeministri dhe ministri i Punëve të Jashtme, Edmond Haxhinasto priti dje në një takim sekretarin e Përgjithshëm të Ministrisë së Punëve të Jashtme të Greqisë, z. Yannis-Alexis Zepos.
Në takim u shpreh vullneti i përbashkët për zhvillimin dhe konkretizimin e mëtejshëm të marrëdhënieve të fqinjësisë së mirë dhe të bashkëpunimit të gjithanshëm, në interes të dy vendeve dhe popujve tanë. Zepos nënvizoi se Greqia do të vazhdojë të jetë nga mbështetësit kryesorë në përpjekjet që bën Shqipëria për integrimin evropian, duke ofruar asistencën e saj konkrete në këtë drejtim. Ai përcolli gjithashtu ftesën e Ministrit të Punëve të Jashtme të Republikës Greke, S. Lambrinidis, për E. Haxhinasto, për të vizituar Athinën.
Më tej, Zepos vlerësoi kontributin e shqiptarëve që jetojnë në Greqi dhe u shpreh se ata janë një urë e rëndësishme për forcimin e marrëdhënieve midis dy vendeve.
Haxhinasto theksoi nevojën e forcimit të mëtejshëm të bashkëpunimit midis dy vendeve. “Me vullnetin dhe angazhimin e përbashkët që ekziston, do të realizojmë progres dhe hapa konkrete në gjithë çështjet që ekzistojnë  midis dy vendeve tona. Marrëdhëniet me Greqinë janë substanciale”, u shpreh ministri Haxhinasto dhe perceptimi publik për to duhet të reflektojë këtë substancë.
Duke falënderuar për mbështetjen e vazhdueshme të Greqisë ndaj integrimit të Shqipërisë në BE, Haxhinasto tha se shpreson që opinioni i Komisionit Evropian të bazohet në zhvillimet pozitive në parlamentin shqiptar.