Beja: Rreth 300 shkolla nuk kanë klasa, bëjnë mësim me dy turne
Ajo çka u paralajmërua pa nisur shkolla, pranohet hapur nga Ministria e Arsimit. Reforma për kalimin nga sistemi 8-vjeçar në atë 9-vjeçar, po përballet me probleme serioze. Në mungesë të ambienteve, nxënësit detyrohen të bëjnë mësim me 2, madje dhe me 3 turne. Janë jo pak, por 307 shkolla, të cilat e kanë të pamundur të përballojnë fluksin. Pjesa më e madhe e tyre në Tiranë. Ministri i Arsimit Fatos Beja, deklaroi dje në komisionin parlamentar të Edukimit se për shkak të mbipopullimit, është e domosdoshme marrja e ambienteve me qira. "Mjaft problematike paraqitet situata në qytetin e Tiranës dhe në rrethinat e tij si Kamëz e Qesarakë, ku mësimi kryhet jo me një e dy, por me tre turne", tha Beja. Ai shtoi se MASH, ka marrë me qira ambientet e 21 lokaleve pranë shkollave për të përballuar numrin e madh të nxënësve në sistemin 9-vjeçar. Po t'i referohesh statistikave të ministrisë, aktualisht mësim me dy turne bëjnë 16 % e shkollave në rang vendi. Por gjatë raportimit të tij në komision, ministri Beja fajësoi pushtetin vendor, se nuk ka respektuar afatet për rikonstruksionin e disa shkollave. "Është një numër i konsiderueshëm shkollash, të cilat duhet të kishin përfunduar me çeljen e vitit shkollor, por u bënë gati dy muaj dhe punimet vazhdojnë ende. Kjo është një pengesë serioze për realizimin e procesit mësimor", tha Beja.
Universitetet private
Vetëm për vitin 2008 kanë marrë licencë nga Ministria e Arsimit dhe e shkencës 7 universitete private, duke e çuar numrin e tyre në 20. Këtë bëri me dije ministri i Arsimit, Fatos Beja. Ai pranoi se vetëm 4 prej tyre janë të akredituar. Mungesa e akreditimit bën, që për një pjesë të konsiderueshme të këtyre shkollave të larta të hidhen dyshime për cilësinë e mësimdhënies. Por kjo është vetëm një nga "boshllëqet", që sjell pamundësia për të matur standardet. Në pikëpyetje vihen diplomat që lëshojnë këta institucione. Ndonëse ministri i Arsimit ka raportuar shifrat, nuk ka bërë asnjë deklaratë, se çfarë e pengon dikasterin, që ai drejton për të çuar drejt përfundimit akreditimin e të gjithë universiteteve private. Jo pak jehonë iu bë kompanisë se huaj, që pritej të pajtohej për të monitoruar punën në këto institucione, por duket gjithçka ka mbetur pezull. z.ll