Berat, lagja turistike Kala pa ndriçim, turistët reduktojnë shëtitjet

Sistemi i ndriçimit në lagjen Kala të qytetit të Beratit edhe pas disa investimeve që janë bërë nga bashkia lë për të dëshiruar. Në këtë sezon kur fluksi i turistëve është i lartë dhe shëtitjet e pasditeve vonë janë më të preferuarat, mungesa e ndriçimit bën që vizitorët të largohen më shpejt për tu shpëtuar incidenteve që mund të vijnë nga rrugicat e zhytura në errësirë. Shqetësimin për mosfunksionim të ndriçimit e shprehin vetë banorët e kësaj lagjeje të cilët e ndjejnë nevojën e lllambave elektrike kur ata kthehen në banesat e tyre. Sipas banorëve të kësaj lagjeje, ndriçimi është bërë kryesisht në rrugët kryesore të lagjes Kala por në rrugicat e saj ka zona ku ke frikë të kalosh pas orës 10:00 të darkës. Banorët shprehen se u bënë instalime të dritave por problemi është që ky ndriçim funksionon pjesë- pjesë. Një nga projektet e nisura përfundoi për ndriçimin e rrugës së lagjes Kala e cila e lidh atë me qendrën e qytetit, investim i cili u bë me pajisje moderne por që u vodhën brenda vitit nga persona të paidentifikuar. Banorët kërkojnë të ketë më shumë vëmendje nga policia bashkiake, e cila duhet të kapë dhe vërë para përgjegjësisë autorët që kryejnë këto akte skandaloze të cilët nuk bëjnë gjë tjetër veçse pengojnë qarkullimit e lirshëm duke e bërë më të lehtë lëvizjen e tyre në orët e vona të darkës. Problem tjetër shqetësues për banorët mbeten pajisjet e vjetra të instaluara para atyre të rejave në shtylla të elektrikut, të cilat nuk janë hequr nga punonjës së OSSH-së dhe të cilët mund të sjellin dëmtime serioze. Një rast precedent është në një nga rrugicat ku në një shtyllë druri që rrezikohet të shembet janë të kapur kabujt elektrikë.