Berisha: Konferenca e PS dramë me dy akte, Rama do të shtrijë 20 %-in në të gjithë vendin

Kryeministri në mbledhje qeverie komenton konferencën dy ditore të PS-së

Kryeministri Sali Berisha në mbledhjen e radhës të qeverisë komentoi konferencën dyditore të Partisë Socialiste. Ndalur në ditën e parë të kësja konference e cila trajtoi çështjet që lidhen me territorin, kreu i qeverisë vlerësoi se sinjali i qartë i diskutimeve të kryesocialistit Rama lidhej me marrjen në dorë të të gjitha atributeve që aktualisht janë të qeverisë vendore.
“Konferenca e PS ishte një dramë me dy akte, ku nga njëra anë ishin mbledhur arkitektët milionerë. Edi Rama kërkon të shtrijë 20% në të gjithë territorin e vendit. Ne përgëzojmë vendimin për prishjen e çdo ndërtimi pa leje në gjithë territorin e vendit, por Kryeministri i ardhshëm dëshmoi se qëllimi i tij ishte të shtinte në dorë territorin, që është atribut i pushtetit vendor. Vendimi i Edi Ramës se do shembë edhe shtëpitë me leje është një akt i paprecedentë”, vuri në dukje Berisha. Njëkohësisht, kreu i qeverisë higjetoi ashpër pasardhësin e tij lidhur me projektet që kërkon të aplikojë në bregdet. “Dyshja Rama-Kokëdhima po ndërtojnë kështjella në zonën bregdetare ku është e ndaluar kategorisht ndërtimi. I them Edi Ramës të mosprovokojë shqiptarët me Enver Hoxhën pasi do përballet me zemërimin e tyre. Shqiptarët panë ekipin më injorant, më të paskrupullt që do të qeverisë vendin”, nënvizoi Berisha.
Ndërsa ndalur në ditën e dytë të konferencës që trajtoi çështjet ekonomike, kryeministri ironizoi përballjen e ministrave në ardhje dhe të ekspertëve në panel.
“Të ftuarit panë para tyre ekipin më pa dije, më injorantë. Vetë piktori njoftoi shqiptarët se për 3 muaj nuk do të ketë drita, kanë bërë gati skemën e prerjes së energjisë. Por unë njoftoj se këtë vit kemi lënë 300 mln kë/orë më shumë se vitin e kaluar dhe këtë vit kemi më shumë energji. Ky nuk është Edi Rama, ky është Edi Drama”, u shpreh Kryeministri.

Kreu i qeverisë tha se të ftuarit e PS rrëzuan programin ekonomik të saj.
“Të gjithë thanë se detyra numër një është parandalimi i krizës. Ata që i takova, u kërkova haptas që ta ndihmojnë qeverinë e ardhshme. Se faturën e paguajnë qytetarët, këta nuk paguajnë. Ndërsa për financat u them shqiptarëve me sinqeritet dhe vendosmëri se sistemi doganor dhe tatimor i vendit, pavarësisht nga të metat që ka, ka merita shumë të mëdha në arritjet e këtij vendi. Ka mbledhur 9.2 mln dollarë më shumë dhe kjo nuk arrihej kurrë pa luftën kundër informalitetit. Por këta që vijnë kanë synimin e vetëm të mbushin arkat e veta. Piktori paralajmëronte se do të fuste vendin në recession dhe eshtë oguri më I zi i kësaj qeverie. Administrate të ruajë stabilitetin makro-ekonomik, treguesit janë më pozitivë se vjet”, nënvizoi Berisha, gjatë fjalës së tij.