Berisha-Molnari: Shqipëria, përpjekje entuziaste për integrimin Evropian

Kryeministri Sali Berisha priti dje në një takim ambasadorin e Republikës së Hungarisë në Tiranë, Sandor Molnari, me rastin e përfundimit të detyrës së tij në vendin tonë.
Berisha e falënderoi dhe i shprehu mirënjohje ambasadorit Molnari për mbështetjen e jashtëzakonshme që Hungaria i ka thënë në vazhdimësi Shqipërisë, si për anëtarësimin në NATO, për liberalizimin e vizave dhe për të gjitha hapat dhe stadet e projektit madhor kombëtar, anëtarësimit të plotë në Bashkimin Evropian. Ambasadori Sandor Molnari e falënderoi përzemërsisht kryeministrin Berisha për bashkëpunimin e shkëlqyer gjatë kësaj periudhe, si dhe për mbështetjen që ai dhe qeveria shqiptare i kanë dhënë në misionin e tij në Tiranë.
Molnari i rikonfirmoi kryeministrit Berisha se Hungaria do të vijojë të jetë një mbështetëse e zjarrtë dhe entuziaste e Shqipërisë dhe qeverisë shqiptare në të gjithë përpjekjet për integrimin në Bashkimin Evropian, por edhe mbështetëse e  aspiratës evropiane të rajonit në tërësi.
Në takim u vlerësuan marrëdhëniet e shkëlqyera midis dy vendeve, të bazuara mbi një traditë të gjatë historike të miqësisë midis dy popujve, si dhe u rikonfirmua vullneti i të dy vendeve dhe qeverive për t’i zgjeruar, thelluar, e konsoliduar edhe më tej këto marrëdhënie në të gjitha fushat, në veçanti në fushën ekonomike dhe në thithjen e investitorëve hungarezë në Shqipëri.
Ambasadori Molnari theksoi, gjithashtu, se ka qenë personalisht një dëshmitar i ndryshimeve të jashtëzakonshme që Shqipëria ka pësuar gjatë këtyre viteve të fundit dhe vlerësoi progresin qartësisht të dukshëm e të shënuar që vendi ka realizuar gjatë kësaj periudhe, si  anëtarësimi në NATO, liberalizimi i vizave dhe ecja me shpejtësi drejt anëtarësimit të plotë në BE. Njëkohësisht, ambasadori Molnari vlerësoi arritjen tjetër madhore të kombit shqiptar, pavarësinë e Kosovës, duke theksuar kontributin e rëndësishëm të Shqipërisë me rolin e saj konstruktiv e promovues të paqes, bashkëpunimit e miqësisë në rajon.
Duke i shprehur edhe një herë mirënjohje për Hungarinë, për Kryeministrin Orban, për vëmendjen dhe kontributin e madh e miqësor në mbështetje të Shqipërisë, Kryeministri Berisha e mbylli takimin duke vlerësuar edhe një herë kontributin e ambasadorit Molnari në forcimin e mëtejshëm të marrëdhënieve mes dy vendeve e popujve, ndërsa theksoi se edhe pas përfundimit të detyrës në Tiranë, ambasadori Molnari vijon të mbetet një mik i ngushtë dhe i vërtetë i Shqipërisë e shqiptarëve.

Sllovenia mbështet kursin e integrimit Evropian të Shqipërisë
Kryeministri Berisha priti dje në takim, ambasadorin e Sllovenisë në Shqipëri Bojan Bertoncelj, me rastin e marrjes së detyrës. Berisha i përcolli gjithashtu kryeministrit slloven Pahor, përshëndetjet më të përzemërta.
Në këtë takim u vlerësuan marrëdhëniet shumë të mira mes dy vendeve si në planin dypalësh, ashtu edhe në bashkëpunimin si aleatë të NATO-s, por edhe në kuadër të bashkëpunimit rajonal. Po ashtu në takim u rikonfirmua vullneti i të dy palëve për të zgjeruar e thelluar më tej bashkëpunimin në fushat me interes reciprok, veçanërisht në fushën ekonomike e tregtare, në atë të turizmit dhe nxitjes së investitorëve sllovenë, të cilët gjatë kësaj periudhe kanë treguar interes të madh për potencialet e rëndësishme që ofron vendi si edhe për klimën tepër të favorshme për biznesin dhe investime në Shqipëri. Më tej Kryeministri Berisha falënderuar ambasadorin Bertoncelj për mbështetjen e fuqishme që Sllovenia i dha Shqipërisë për anëtarësimin në NATO dhe, në veçanti, për liberalizimin e vizave për qytetarët shqiptarë.
Gjithashtu kreu i qeverisë Berisha vlerësoi kontributin që Sllovenia, si vend anëtar i Bashkimit Europian, po jep përmes procesit të Brdo-s, në konsolidimin e mirëkuptimit e bashkëpunimit në rajon.
Po ashtu ambasadori Bertoncelj i konfirmoi Kryeministrit Berisha, mbështetjen e plotë të Sllovenisë në hapat e mëtejshëm për anëtarësimin e Shqipërisë në Bashkimin Europian.