Berisha: Rama fajtor për pluhurin në Tiranë

11/04/2005  Lideri demokrat Sali Berisha, ka bërë fajtor kryetarin e Bashkisë, Edi Rama, për ndotjen e ambientit në Tiranë. Sipas kryetarit të PD-së, Kryebashkiaku i Tiranës, nuk ka kërkuar nga ndërtuesit plotësimin e standarteve për mbrojtjen e ambientit gjatë ndërtimit. “Kryekorruptori i Tiranës, nuk ka gojë t’i kërkojë ndërtuesve plotësimin e standarteve gjatë ndërtimit për të mbajtur pastër qytetin, sepse i ka kërkuar ryshfet të majmë më parë, për t’i dhënë lejen e ndërtimit. Unë ju siguroj se ne kemi ndërtues të shkëlqyer që e duan qytetin, por ata nuk mund të paguajnë edhe ryshfetin e Ramës që shkon në shifra marramendëse, edhe shpenzimet për ruajtjen e pastër të qytetit”, tha Berisha. Sipas tij, Tirana është kthyer në qytetin më të ndotur të botës, për shkak të mosmarrjes së masave për mbrojtjen e ambientit, por edhe si pasojë e zvarritjes së mbarimit të punimeve në rrugët e kryeqytetit. “Natyrisht, po të mbash hapur rrugën një vit, dhe mos përfundosh punimet sepse pret kryeministrin me gërshërë të vijë të presë shiritin, kjo do të ndodhë”, tha Berisha.