"Besa" shqiptare mbërrin në Ramla të Izraelit

Shqiptarët që shpëtuan hebrenjtë gjatë Holokaustit, të përjetësuar në imazhe fotografike, mbërrijnë në qytetin Ramla të Izraelit. Përfaqësia e Republikës së Shqipërisë në Shtetin e Izraelit, në bashkëpunim me Bashkinë e Ramla-s dhe Muzeun Yad Vashem të Jerusalemit kanë hapur ekspozitën e fotografit amerikan Norman Gershman, "BESA - Kodi i Nderit. Myslimanët shqiptarë që shpëtuan hebrenjtë gjatë Holokaustit". Ceremonia zyrtare e hapjes së ekspozitës më 18 mars, u organizua në Muzeun e qytetit të Ramla-s, në prani të ambasadorit shqiptar në Izrael, z. Tonin Gjuraj dhe kryetarit të bashkisë së qytetit, z. Yoel Lavi. Ekspozita fotografike, e prezantuar në disa vende të botës, pak kohë më parë edhe në Galerinë e Arteve në Tiranë, në Ramla është çelur në dy gjuhë: hebraisht dhe arabisht, meqenëse ky qytet i Izraelit është një qytet tipik shumëfetar, me popullsi të përzier hebrenje, myslimane e të krishterë. Vizitorë të shumtë, studentë, nxënës të shkollave të mesme, por edhe përfaqësues të pushtetit lokal, kanë treguar interes të madh për ekspozitën, edhe pse disa prej tyre pranonin mosnjohjen e një akti të tillë prej shqiptarëve. Kjo, përveç të tjerave, edhe si pasojë e izolimit të vendit tonë për një kohë të gjatë. Në përshëndetjen e tij, kryetari i Bashkisë së Ramla-s, z. Lavi, shprehu mirënjohjen e vendit të tij për Shqipërinë e shqiptarët, duke nënvizuar gjithashtu se ai ishte personalisht shumë i nderuar që, pas Jerusalemit në nëntor të 2007-ës, një ekspozitë e tillë arriti të hapej në qytetin që ai drejtonte prej shumë vitesh. Kurse ambasadori i RSH-së, z. Tonin Gjuraj, në fillim ka shprehur mirënjohjen për Bashkinë e Ramla-s dhe ka falënderuar fotografin e njohur amerikan, Norman Gershman, për lartësimin që i ka bërë këtij akti fisnik të shqiptarëve dhe përmasat e dhëna. Më tej, ambasadori Gjuraj, midis të tjerave, është përqendruar më shumë në zbërthimin e konceptit etik të besës në të drejtën zakonore tradicionale shqiptare, në strukturën etike të kodit të sjelljes midis shqiptarëve, duke argumentuar se ky kod i përkiste dhe u përket shqiptarëve njëlloj, pavarësisht feve të ndryshme. Ekspozita, e cila është quajtur nga Muzeu Yad Vashem në Jerusalem një "Ekspozitë Udhëtuese", do të qëndrojë e hapur në qytetin e Ramla-s deri në fund të prillit 2009 dhe më pas do të hapet edhe në disa qytete të tjera izraelite, si në Haifa, Ako, Beersheva etj.