Biberaj përshëndet qëndrimin francez për zgjerimin e BE-së me Ballkanin Perëndimor

Deputeti i Partisë Demokratike, Aleksandër Biberaj ka përshëndetur qëndrimin francez për zgjerimin e Bashkimit Europian me vendet e Ballkanit Perëndimor, përfshirë edhe Shqipërinë. Zgjerimi i BE-së me vendet e Ballkanit Perëndimor ka qenë dhe mbetet prioritet dhe sfidë e rëndësishme e politikës së re europiane. Integrimi sa më i shpejtë i vendeve të Ballkanit Perëndimor në BE i shërben më së miri paqes dhe stabilitetit afatgjatë jo vetëm të rajonit të trazuar të Ballkanit, por edhe të vetë Europës, ka theksuar deputeti Biberaj. Nëpërmjet një deklarate për shtyp, deputeti demokrat vlerëson qëndrimin francez i cili vjen në momentin e duhur për Shqipërinë, duke përmendur këtu aplikimin e Shqipërisë për statusin e vendit kandidat për anëtarësim në Bashkimin Europian brenda Presidencës Çeke. Ndër të tjera, Biberaj shprehet veçon se integrimi sa më i shpejtë i Shqipërisë në BE, si dhe lëvizja e lirë pa viza e qytetarëve shqiptarë mbeten prioritete kryesore jo vetëm të maxhorancës, por edhe të politikës shqiptare në përgjithësi. Pasi, sipas tij këto përfaqësojnë edhe interesa madhore dhe strategjike të Shqipërisë dhe shqiptarëve, interesa që natyrisht qëndrojnë mbi interesat politiko-partiake.