Bode: Rritja ekonomike për vitin e ardhshëm parashikohet 4.3 për qind
Rritja ekonomike për vitin 2012 parashikohet të afrohet me trendet normale të rritjes të viteve para krizës ekonomike financiare globale. Sipas ministrit të Financave, Ridvan Bode, buxheti i vitit që vjen orientohet drejt ruajtjes së stabilitetit makroekonomik si dhe drejt mbështetjes së rritjes ekonomike.
“Rritja ekonomike për vitin 2012 parashikohet të arrijë 4.3 për qind e Prodhimit të Brendshëm Bruto nga 3.9 për qind që është e pritshmja e këtij viti. Konsolidimi i financave publike, stabilizimi i nivelit të përgjithshëm të çmimeve dhe zbutja e deficitit tё llogarisë korrente, pёrbёjnё synimet bazë tё politikave tё koordinuara fiskale e monetare tё vendit”, u shpreh Bode, gjatë prezantimit të buxhetit në Kuvend.
Ndërkaq, ministri i Financave i konsideroi demagogji propozimet e Partisë Socialiste për heqjen e TVSH-së apo përgjysmimin e saj për disa produkte bazë si dhe vendosjen e taksës progresive.
“Nuk shoh asnjë shenjë reflektimi për politikat e nevojshme që duhet të ndërmarrë qeveria në kushtet e krizës ekonomike financiare globale dhe reflekton mungesën totale të alternativës nga ana e opozitës, etjen e shfrenuar për të bërë demagogji, jashtë çdo principi dhe realiteti”, deklaroi Bode.
Kreu i financave tha se një politikë fiskale duhet të jetë adekuate, e përshtatshme dhe e përputhur për momentin.
“Sfida jonë është ekonomia reale, rikthimi i ekonomisë në ritmet e rritjes së saj në nivelin 5-6për qind dhe jo ndërmarrja e politikave të përçara, që kanë një sheqerosje në dukje dhe thelbin e kanë po aq të helmët sa në qeverisjet e mëparshme”- tha më tej Bode. Modeli juaj, vijoi Bode, ishte hedhja e produkteve shqiptare në përrenj. “Modeli jonë është mbështetja e fermerit vendas dhe zëvendësimi në treg gjithnjë e më shumë i mallrave të importit me ato vendase”, nënvizoi ministri Bode.
Duke u ndalur në propozimin mbi vendosjen e taksimit progresiv, Bode tha se në qeverisjen socialiste ishte 35 për qind mbi pagën. “Kërkoni të hapni tregun dhe shtigjet e evazionit, sepse nuk dini ç’është konkurrenca dhe nuk dini të konkurroni”, tha më tej ministri i Financave, Ridvan Bode.
Reagimi i ministrit të Financave erdhi pas deklaratës së nënkryetares së Komisionit Parlamentar të Ekonomisë dhe Financave, Mimi Kodheli, e cila i kërkoi Kuvendit të marrë në shqyrtim propozimet e bëra nga Partia Socialiste, pasi, sipas saj, ato synojnë përmirësimin e cilësisë së jetës për qytetarët të cilët jetojnë nën minimumin jetik. Sipas saj, në kushtet kur ekonomia shqiptare është mbërthyer nga kriza ekonomike globale çmimet e produkteve bazë janë rritur, ndërsa fuqia blerëse është në rënie, për shkak se çmimet e produkteve bazë janë 2-3 fishuar. Kodheli, në emër të grupit parlamentar të PS-së, parashtroi propozimet, të cilat, sipas saj, do të ulnin koston e jetesës së qytetarit shqiptar e që kanë të bëjnë me përgjysmimin e TVSH-së për mallra bazë nga importi, që do të sillte një efekt prej 1.8 miliardë lekë, uljen e TVSH-së për energjinë elektrike nga 20 për qind në 6 për qind, që do të kishte një efekt vetëm 3.1 miliardë lekë, si dhe heqjen e TVSH-së për ilaçet dhe librat. Kodheli kërkoi edhe rikthimin e taksimit progresiv. Në këtë kuadër, Kodheli nënvizoi se efektet e ndërmarrjes së kësaj pakete do të mund të kompensoheshin fare mirë përmes luftës kundër korrupsionit.
Rritja reale e PBB-së
2008 - 7.5 për qind
2009 - 3.3 për qind
2010 - 3.8 për qind
2011 - 3.9 për qind
2012 - 4.3 për qind