Brace: Ndryshimet në qeveri, karshillëk ndaj prokurorisë

TIRANË- Nënkryetari i grupit parlamentar i PS-së, Erion Brace, ka deklaruar dje se ndryshimet e fundit në qeveri janë shenjë karshillëku dhe sfide e hapur ndaj prokurorisë.“Ndryshimet e fundit në qeveri u nxitën me dhunë në shenjë karshillëku dhe sfidë të hapur, për të mos thënë luftë ndaj prokurorisë dhe veprimeve të saj gjatë kësaj jave lidhur me hetimin e krimit dhe të pandehurve për të!. Gjatë kësaj jave, Prokuroria njoftoi se ka formuluar akuzë të re lidhur me hetimet mbi krimin shtetëror të Gërdecit: atë të vrasjes në më shumë se një rast të kryer në Gërdec. Pa i lejuar vetes në asnjë çast e rast, ndërhyrjen në punët e akuzës, ne e shohim këtë veprim një hap në rrugën e duhur për të zbardhur ngjarjen, për të hetuar në gjithë përmasën krimin, për të bërë drejtësi për fajtorët dhe mbi të gjitha për viktimat”, tha dje Brace. Nënkryetari i grupit parlamentar shtoi se PS inkurajon Prokurorinë në punën e saj ashtu siç kërkon me forcë që organi i akuzës të zbatojë ligjin ndaj çdo zyrtari që pengon drejtësinë që të zbardhë krimin. “Po këtë javë, prokuroria njoftoi se ka marrë dhe 3 muaj kohë për të thelluar hetimet ndaj personave nën hetim për këtë krim, nën motivin e pengesave të mëdha të hasura, të krijuara për të hetuar ndaj imunitarëve politikë të dyshuar gjerësisht si të përfshirë në krim.Ne e gjykojmë të arsyeshëm veprimin e prokurorisë ashtu siç kërkojmë me forcë që prokuroria të zbatojë ligjin me rreptësi ndaj çdo zyrtari apo kujtdo tjetër që pengon drejtësinë të zbardhë krimin”, tha ai.