Brazili e Spanja, favoritë në ‘Londra 2012’

‘Euro 2012’ mori fund, por pas tri javësh do të fillojë një tjetër eveniment i rëndësishëm, ose më mirë të themi, më i rëndësishmi në sport. Bëhet fjalë për Lojërat Olimpike, të cilat do të startojnë më 27 korrik dhe do të përfundojnë më 10 gusht.

Krahas sporteve të ndryshme, në ‘Londra 2012’ do të marrin pjesë edhe përfaqësueset e futbollit, me grupmoshat U-23. Dhe, sipas bastores së njohur William Hill, Brazili, që në Olimpiadën e Pekinit kishte përfunduar i treti, është favorit i këtij evenimenti për ta fituar medaljen e artë, me kuotën më të vogël, 2,88.

Skuadra jug-amerikane përbëhet nga lojtarë të njohur si David Luiz i Chelseat, Alexandre Pato i Milanit dhe pa dyshim ylli i këtij vendi, Neymar nga Santos. Në pozitën e dytë, sa u përket mundësive reale për të ngadhënjyer, gjendet Spanja, e cila është kampione e Evropës në grupmoshat U-17, U-19 e U-21 dhe natyrisht në kategorinë seniore. William Hill, triumfin e ‘La Rojita’ e ka vlerësuar me kuotën 3.

Ndërkaq, mikpritësi i Olimpiadës, Britania e Madhe është favoriti numër tre, dhe është kuotuar me 7. Edhe pse mungon David Beckham, ky ekip mund të përqendrohet tek veteranët Ryan Giggs e Craig Bellamy, plus mbrojtësi Micah Richards.

Natyrisht, nuk duhet harruar se britanikët do t’i kenë në ekip edhe talentët si Daniel Sturridge, Aaron Ramsay e Tom Cleverley. Ndër skuadrat që kanë mundësi për të triumfuar në Londër shihet edhe Zvicra, e cila në Olimpiadë do të përfaqësohet nga pesë futbollistë shqiptarë.