Brukseli miraton rekomandimin për heqjen e vizave për shqiptarët

Rekomandimi i Kolegjit të komisionerëve të Brukselit për heqjen e regjimit të vizave afatshkurtra me shqiptarët është miratuar dje pa debat dhe pritet të bëhet sot publik nga komisionerja për çështjet e brendshme, Cecilia Malstromm. Miratimi formal do të jepet në samitin e Sarajevës më 2 qershor, çka nulifikon gjithë përpjekjen e opozitës së Edi Ramës për të shtyrë në pafundësi lëvizjen e lirë të shqiptarëve

Kolegji i Komisionerëve miratoi dje pa diskutime rekomandimin për liberalizimin e vizave me Shqipërinë dhe Bosnje Hercegovinën.
Ky rekomandim është pozitiv, por i kushtëzuar me përmbushjen e kritereve të mbetura nga të dy vendet e prapambetura të rajonit për këtë proces. Për heqjen e regjimit të vizave, Shqipërisë i kërkohet strategji për riintegrimin e të riatdhesuarve, zbatim efikas i kuadrit ligjor për luftën ndaj krimit të organizuar dhe korrupsionit, e po kështu zbatim efikas të ligjit të ri për konfiskimin e aseteve kriminale.
Rekomandimi i Komisionit u miratua sipas “procedurës së shkruar” dhe hyn në fuqi të enjten në orën 12:00 ku pritet të këtë dhe një konferencë për shtyp. Heqja e vizave për qytetarët shqiptare tashmë duket se është e afërt.
Ndërkaq çështja e vizave do të jetë edhe në axhendën e ministrave të brendshëm të BE-së takimi i të cilëve do të zhvillohet në datat 3-4 qershor. Kështu lëvizja pa viza e qytetarëve shqiptarë në zonën “Schengen” tashmë ka nevojë për votën e Parlamentit Europian dhe për miratimin e këshillit të ministrave.
Kësisoj, pritshmëria më e madhe për vendimin përfundimtar për heqjen e vizave pritet të vijë në vjeshtë, kjo edhe për shkak të axhendës së Brukselit.

Procedurat deri në heqjen e vizave
Liberalizimi i vizave në vendet e Bashkimit Europian për shtetasit shqiptarë, që posedojnë pasaporta biometrike do të shpallet zyrtarisht në vjeshtën e këtij viti.
Në fund të tetorit me botimin në Fletoren Zyrtare do të marrë fuqi ekzekutuese çka do të thotë se kjo është dhe data më e mundshme kur shqiptarët do të dalin lirisht për në vendet e BE. Në bazë të datave të shpallura në axhendën e institucioneve europiane, pritet që pas prezantimit të rekomandimit për liberalizimin e vizave në Kolegjin e Komisionerëve Europianë dhe më pas në Parlamentin Europian procedura të vazhdojë me përgatitjen e propozimit të Komisionit për shpalljen publikisht në Samitin e Ministrave të Jashtëm BE-Ballkani Perëndimor, që do të mbahet në Sarajevë më 2 qershor 2010.
Sipas gjasave, jashtë procedurës legjislative, pritet që gjatë qershorit gjatë takimeve të parashikuara përkatësisht Ministrat e Brendshëm dhe Ministrat e Jashtëm, mund të mbështesin politikisht procesin e liberalizimit të vizave me Shqipërinë dhe Bosnjën.
Me marrjen e dritës jeshile nga Komisioni, Parlamenti Europian do të përgatisë vendimin përpara pushimeve të gushtit, për ta diskutuar në komisionet përkatëse, ai i Brendshëm LIBE dhe ai i Jashtëm AFET dhe miratuar në sesion plenar gjatë muajit shtator.
Më pas pritet që Këshilli i Ministrave të Brendshëm dhe të Drejtësisë të marrë vendimin gjatë takimit të datave 7 dhe 8 tetor 2010.
Kjo do të bëjë të mundur që regjimi i liberalizuar i vizave për Shqipërinë të bëhet realitet pas botimit në Fletoren Zyrtare të BE, në fund të muajit tetor 2010, data maksimale 31 tetor 2010 gjatë Presidencës Belge të Bashkimit Europian