Bunkerët blindojnë bregdetin e Semanit në prag të sezonit turistik

Plazhi i Semanit është vendosur shpesh në qendër të vëmendjes për mungesën e kushteve të përshtatshme ndaj pushuesve. Rreth 50 bunkerë të pranishëm në bregdetin e Semanit, jo vetëm zvogëlojnë hapësirën e tij por ofrojnë një imazh aspak të pëlqyeshëm në këtë prag sezoni veror.

Kohë më parë, Ministria e Mbrojtjes në bashkëpunim me komunën e Topojës nisën aksionin e largimit të bunkerëve. Aksioni nisi me nxjerrjen e tyre nga uji dhe grumbullimin e tyre në breg ku edhe vazhdojnë të jenë prej muajsh. Baticat e detit i kanë afruar përsëri bunkerët në ujë duke krijuar vështirësi për largimin e tyre. Për këtë arsye, sipas inxhinierit Genci Pina pritet që javën e ardhshme të kryhet një tjetër studim i zonës në mënyrë që ky bregdet të jetë gati për sezonin e ri turistik. Por kjo zonë nuk ka qenë e vetmja e cila është bllokuar ose rrezikon të ketë një imazh të keq nga mbetjet inerte apo bunkerët e mbetur në vite. Në këtë prag të sezonit turistik gjëndja paraqitet problematike edhe në disa zona të tjera bregdetare.

Last Updated on E Shtune, 03 Prill 2010 18:29